Dünn enin türlü devletlerindän 235 üürencinin arasında katıldıı yarışmaya, proekt angısını Gagauziya üürencisi Dmitriy Guran hazırladı «Games» kategoriyasında 9-cu eri aldı. Dmitriy bu başarlar için GRT kanalında «Eni gün» programasında annattı.
Dmitriy Guran için programlaştırma o diil salt kompyuter kodların yazması hem algoritmaların kurması, ama bir kolaylık kendi kreativ fikirlerini gerçekleştirmää hem kendi oyunnarını yaratmaa. Devletlär arası olimpiadaya o bir oyunu getirdi, angısını kendisi hazırladı. Onun proekti kendi kategoriyasında en başarılı on iş arasında oldu.
DMİTRİY GURAN Kongaz küüyün T. Zanet adına liţey üürencisi
Çok sevindim, şaşırdım da. Bölä büük bir yarışmada bölä bir üüsek eri almak benim için halezdän şok oldu.
«Bu proekt bir oyun, yapıların kurmasında usta simulätoru. Oyuncu bir yapı kurmasında işçisinin rolündä bulunȇr. Ona missiya veriler – bir ev yapmaa. Oyunun sırasında bu işi etap-etap geçincä siz bir ev yapȇrsınız. İşinizi dooru hem düzgün bitirdiktän sora sizä sertifikat veriler hem sizi işä kablederlär. Proektin maanası budur».
235 pay alıcının arasında 9-cu eri almak kolay olmadı. Bu başarıya hazırlanmakta Dmitriy çok çalıştı, ona üüredicisi Vera İkizli da destek oldu. Bu diil ilk proekt angısını onnar birliktä tandem olarak hazırladılar
VERA İKİZLİ Kongaz küüyün T. Zanet adına liţeyin informatika üüredicisi
«Fikir baştan bitkiya kadar Dmitriyin kendisindi. Bän sade onu dorudardım, yannış bir bişey varsa gösterdim hem düzeltmää yardım ettim. Ama çeketmesindän sonuna kadar bu onun proektı».
Dmitriy için bu gibi olimpiyadada şansora ikinci bölä gözäl bir başarı.Geçän yılın onun «Expedition to Space» adıylan proekti 235 iş arasında 18-ci eri aldı. Ama kendi aylesindä o diil yalnız kim beener bölä işlärlän zanaatlanmaa. Onun kızkardaşları hep ölä pay aldılar bölä olimpiyadalarda. Nina Guran 2025-ci yılda kendi yaş kategoriyasında birinci eri aldı. Taa bir kızkardaşı Viktoriya da yarışmada gözäl başarları gösterdi.
DMİTRİY GURAN
«Biz birbirimizi destekleeriz, becermeklerimizlän paylaşêrız. Nina oyunun hazırlanmasında bana yardım etti. Büük kızkardaşım Viktoriya çok kreativ tarafından becerikli . Fikirlerin hazırlanmasında o da bana yardım etti».
Büün Dmitriy kompyuter oyunnarınnan zanatlanmaa ilerleder, da eni proektlär için düşünêr. Onun laflarına görä devletlär arası yarışmalar ona vererlär kolaylık diil sade kendi becermeklerini göstermää ama eni bilgileri kazanmaa da yardımcı olȇr.
DMİTRİY GURAN
«Benim için pek önemli yaptıı işlär insannara fayda getirsin – Gagauziyaya, Moldovaya hem bütün dünneya. Gelecektä yaşamamı kiber güvenliklän baalama isteerim. Bu benim büük bir istemäm».
Dmitriyi Guran için bu başarılar önemli bir adım onun kompuyuter proglamalarınnan baalı zanaatında . Şindi sa ilerdä eni proektlar, eni yarışmalar hem kendi becermeklerini geliştirmää bir kolaylık.