Gagauziyada seftä Sambo çempionatı geçti. Onda pay aldılar sportçular Kaguldan, Leovadan, Kantemirdän, Valkaneştän, Kazayaktan hem Komrattan. Geneldän 120 sportçu 10-16 yaş arası.

Gagauziya sambo uurunda ilk çempionatın en görümnü sportçularının arasında Nikolay Muska bulundu. Genç sportçu nışannadı, ani sambo onun ikinci yaşaması gibi şansora sayılȇr. 9 yılın süresindä o çok sıra türlü yarışmaklara katıldı, ama bu yıl seftä halklaarası arenasına çıktı.

«Bän sambo uurunda Moldova çempionatını taradım hem bununnan Dünnä çempionatına kendimä yol açtım»,- nışannadı  Nikolay Muska.

Üüredicilär nışannȇȇrlar, ani Nikolay diil sade tehnika uurunda kaavi, ama onun çetin harakteri  güreştä eni daavaları koyup ensemää ona  yardım eder. Ne lääzım bu iş için?

«Disţiplina. Hazırlanȇrım, çok işleerim hem eni başarılara etişmää neetlenerim»,- nışannadı  Nikolay Muska.

Bu sıra Nikolay 60 kila güüdä aarlıı kategoriyasında  ilk eri kazandı. Gagauziya açık çempionatında pay aldılar sportçular Kaguldan, Leovadan, Kantemirdän, Valkaneştän, Kazayaktan hem Komrattan. 120 sportçu 10-16 yaş arasından. Çempionatı geçirennär nışannadılar, ani bu sport çeşidi yıl-yıldan taa sorumnu olȇr.

Pötr Kuru, MD Şannı treneri, nışannadı: «Hepsi çocuklar büün hodulluklan katıldılar. Bütün komandalarlan geldilär. İş çok var».

Takım olarak ilk eri Komrat takımı kazandı, ikinci erdä Çeşmäküü takımı, üçüncüyä kalktılar Kazayak küüyü takımın sportçuları. Kimilerinä deyni bu çempionat becermeklerini göstermää, kuvetlerini denemäk hem eni uurlara kalkmak kolaylıı. «Judo Junior Moldova» cümnä kurumun temsilcisi Grigoriy Moga uşakların ilerlemesi için bölä turnirlerin önemini çizgiledi.

Grigoriy Moga, «Judo Junior Moldova» cümnä kurumun temsilcisi: «Eminim, ani herbir yarışmak ilerlemäk kolaylıı. Herbir güreş-ilerlemenin eni bir adımı. Herbir enseyiş- çalışmak çıkışı, hem herbir uşaan başarı istoriyası».

Gagauziya sport bakannıında nışannadılar, ani çempionat adet gibi olacek gem Gagauziya sambo ilerlemesindä temel olacek. 

Pötr Kuru MD Şannı treneri: «Bitki yıllar sambo uuruna çok dikkatlık veriler. Federaţiya pek aktiv işleer. Biz hepsi turnirlerdä hem çempionatlarda pay alȇrız, Bizim üürenicilerimiz üüsek başarıları göstererlär.    Komratta bu sport çeşidinnän 60 uşak zanaatlanȇrlar, Kazayakta da hep okadar, Çeşmäküüyündä 25 uşak».

Gagauziyada Sambo güreşi uurunda açık çempionatında 17 sportçu en üüsek ödülleri kazandılar. Onnarın arasında iki dä kızçaaz bulundu.