Gagauzi̇yada çi̇ftçi̇li̇k uurunda i̇şleyenneri̇n zanaat günneri̇ni̇ nışannadılar. Çi̇ftçi̇li̇klän baalı zanaatlar büün en önemni zanaatların arasında bulunȇrlar. Çünkü bu uurda çalışannar ekmek büüderlär, devletin mal korkunçsuzluunu kurȇrlar. Yortulu olay Beşalma küüyündä geçti.
Gagauziyada çiftçilerin zanaat yortusuna toplanȇrlar hepsi, kimin hergünkü işi toprak işletmesininnän hem mal büütmesininnän baalı. Onnarın arasında fermerlär, argonomlar, mehanizatorlar hem çok taa başkaları. Bu insannarın katkısı devletin ekonomika ilerlemesindä paasız. Onnar yaşayannara deyni üüsek kaliteli imäk mallarını büüderlär, nışannadı Gagauziya Çiftçi bakanı Sergey İbrişim: «Büün işlemää çiftçilik uurunda kolay diil. Bizdä 4-cü yıl sıravardı kurak. Var nicä söleyelim, ani sizin işiniz devletin mal korkunçsuzluunu kurmaklan baalı. İsteerim şükür etmää sizi hergünkü işiniz için, çünkü siz devletimizin mal korkunçluunu koruyȇrsınız. Dileerim sizä ii başarıları, ko sizin zanaatınızda gençlär peydalansınnar, çünkü bu zanaatta büün işlemää pek istämeerlär. Siz gençlerä örnek olȇrsınız».
GHT başın işini götürän Nikolay Ormanji nışannadı, ani çiftçi uurunda çalışannar hergünkü izmetlerininnän bu uurda Gagauziyanın cümnä-ekonomikası temeleni kaavilederlär.
«Çiftçilik — o ölä bir bölüm, angısında bizim ekonomikamız kaavi durȇr. Bizim regionumuzun var kendi çokyıllık adetleri çiftçilik uurunda. Gagauziya herzaman anılardı kendi kumsal topraklarınınnan, insannarınnan, angıları bilerlär hem severlär işletmää bu topraa. Bu bilgilär bobadan oollara geçerlär. Büün siz- bu adetleri ilerledersiniz»,- Nikolay Ormanji nışannadı.
GHT çiftçilik komissiyası öndercisi Valeriy Manastırlı nışannadı, ani regionun çiftçileri ii çıkışları yıl sonunda göstererlär, ama onnara devlet tarafından destek dä verilsin lääzım.
«Bu salonda bulunȇrlar hali̇z kahramannar-bi̇zi̇m çi̇ftçi̇leri̇mi̇z. Siz hepsiniz biri-birinizi bilersiniz. Siz herzaman biri-birinizä yardım edersiniz, neredä tohumnarlan, neredä sä tehnikaylan , ki herbiri etiştirsin vakıtlan tohumnarı erä koymaa. Ne baalı subsidiyalarlan-HT hem Bakannık Komitetin tarafından biz subsidiyalar fondunu zeedeledecez. Alla versin, ani bereket olsun hem siz işlemää isteyäsiniz»,- Valeriy Manastırlı nışannadı.
Yortulu olayın süresindä çiftçilik uurunda çalışan uzmannar zanaat uurunda üüsek başarıları için şannı adları, gramotaları hem ödülleri kablettilär.