«İlk çan urması» oluşu eni üürenmäk yılının çeketmesini belli etti. Üüürenicilär okullara geldilär. Gagauziyada üürenmäk proţesinä 15 bin 239 üürenici giriştilär. Bu sayıda 1 bin 239 birinci klaslar üürenicileri. Nicä «İlk çan urması» oluşu Kongazçik küüyün gimnaziyasında geçti, annadȇr bizim korespondentimiz Valentina Çoban.
Kongazçik küüyün gimnaziyasında 150 üürenici üürener. Birinci klasa burada 19 kızçaaz hem çocucak gezmää başladılar. Onnarın ilk üüredicisi — Marina İkizli.
«Olunuz dikkat hem islää üüreniniz».
«Bä sevinerim, ani büün seftä okula geldim».
Taa büük üürenicilär açıkladılar, ani yazın dinnendilär da büün büük havezlän okula geldilär.
«Havezlän büün okula geldim. Sevindim, ani genä üüredicilerimnän hem dostlarımnan buluştum».
«Yazı islää geçirdim. Aşırıya da gittim. Franţiyaya gittim anamnan. Büün havezlän okula geldim. Özledim hepsini».
Gimnaziyanın başı Elena Statova diledi, ki eni üürenmäk yılı taa pek başarılı olsun.
Elena Statova, Kongazçik küüyü gimnaziya başı, nışannadı: «Eni bilgileri kabletmää vakıt geldi. Hepsiniz ana okulunuza genä geldiniz. Ko bu yıl sizä deyni meraklı olsun. Başarıları sizä dileerim».
Gagauziya Bakannık komiteti başın ilk yardımcısı İ.Uzun çizgiledi, ani üürenicilär avtonomiyanın yarınkı günü.
İlya Uzun, Gagauziya Bakannık komiteti başı ilk yardımcısı, urguladı: «Sentäbrinin 1-ri — eni enseyişlerin simvolu. Siz başarılı olduynan analar-bobalar sevinerlär hem hodullanȇrlar. Üüredicilär dä büük kuvet koyȇrlar sizi üüretmää deyni. Üüüretim — bizim kuvedimiz. Bilgilerin yadımınnan üüsek uurlara çıkabileriz, bu yaşamakta kendi erimizi bulabileriz».
Moldova Parlamenti deputatı İvanna Köksal üürenicilerä danıştı. O diledi, ki eni üürenmäk yılı meraklı hem türlü gözäl olaylarlan dolu olsun.
İvanna Köksal, Moldova Parlamenti deputatı, nışannadı: «Eni üürenmäk yılınız meraklı hem türlü gözäl olaylarlan dolu ulsun».
Kongazçik küüyü başı E.Tukan istedi, ki eni evlad boyları Ana küülerini andırsınnar.
Evgeniy Tukan, Kongazçik küüyü başı,urguladı: «Dilerim, ki analarınız-bobalarınız hodullansınnar! Başarılı olunuz da kendi okulunuzu bizim küüyümüzü andırınız».
Kongazçik küüyün eks- başı D.İkizli 9-cu klasın üürenicilerinä danıştı, angılarının arasında onun da uşaa.
Dmitriy İkizli, Kongazçik küüyü ȇks-başı, söledi: «Saygılı 9-cu klasın üürenicileri, biliniz, ani bizim okulumuzdan çok islää insan çıktı, ani başarılı oldular türlü sferalarda. Bu okulda becerikli hem talantlı üüredicilär işleerlär. Üüüreniniz. Siz dä başarılı olunuz! Biliniz, ani biz buna umutlanȇrız, hem analar-bobalar hem üüredicilär».
Okulun kapu önündä yortulu atmosfera kuruldu. Uşaklar türkü çaldılar, peet annattılar. Sora ilk çan öttü da üüredicilär he üürenicilär klaslara gittilär. Üüürenmäk proţesi başladı.