Noyabrinin 2-dän Moldovada 2026–2027-cı yılların suuk zamanına kompensaţiyayı kabletmäk için bildirimneri vermäk zamanı başlayacek. Çoyu aylelerä deyni, haliz pensionerlar için, butakım yardım kış zamanına büdjetin önemli payıydır. Avtonomiya yaşayannarı bildirimneri kompensaţiyayı kabletmäk için yazılaceklar mı, Svetlana Dimitroglo soruşturdu.
Avtonomiya yaşayannarı şindän lafederlär nesoy harçları götüreceklär suuk zamanda yısınmak, ȇlektroȇnergiyı ödemäk için, bakınca büünkü günün paalılıklarına, üüsek harçlara hem küçük gelirlerä.
«Nicä dä Moldovanın hepsi yaşayannarı, biz dä bildirimneri kompensaţiyayı suuk aylarda kabletmäk için verecez, çünkü paalar hepsinä büük, nicä kışı yaşayacez, bilmeerim. Geçän yıl verdiydik bildirim kiyadını, ama geçmedi».
Kış zamanı en pek yaşlı insannarı korkudȇr. Küçük pensiyalar, paalı evdeki koşullar örtmeerlär harçları. İmeyä ileçlara para kalmȇȇr.
«Pensionerlarda gaz, şafk için para yok. 1,400 ley iki ay için ödemäk geldi, pensiya sä 2.400 ley kablederim. Gaz, imek için hep o paradan ödemeklär giderlär».
Kimi yaşayannar belli ederlär: yardım için bildirimi mutlaka yazaceklar, çünkü kendibaşına koşullar için harçaları örtämeyeceklär.
«Bän yalnız yaşȇȇrım, mutlaka verecäm bildirimneri».
«Pensiyam 2.800 ley, belli ki yazacez bildirmi, düşecez mi ödemeyä, düşmeyecez mi bilmeerim. Bendä plitada gaz yanȇr, sobayı odunnan yakȇrım. Vererlär bir kub odun, ama hiç almȇȇrım, zerä transport lääzım getirmää, birkimseyä ödemää yarsınnar onnarı da bu yardım mı? Gençlerä dä şindi zor geler, ama yaşlılara taa da zor».
«Gazlan yısınȇrız. Biz eşimnän 6,500 ley kablederiz,hepsi ev koşullarına giderlär».
«Bizdä küçük pensiya, etişmeer, yardım islää olaceydı. Geçän yıl kablettim kompensaţiayı. Bu yıl odunnar da, gaz da pek paalı, nicä kışlayacez bilmeerim. Sobam gazlan yısınȇr, kufnedä kışlayacam».
Kompensaţiya çoyu yaşayannara deyni – kolaylık kış aylarını makar biraz ötrmää. Kimileri söleerlär, ani devlet yardımını suuk zaman için geçän yıl kablettilär.
«Mutlaka bildirimi yollandıracez, 3000 leylän, nicä yaşamaa? Geçän yıl 800 ley kablettik, isläydi».
Kompensaţiyayı kabletmäk için bildirmneri yaşayannar noyabrinin 2-dän veräbileceklär. Küçük gelirli aylelerä deyni bu yardım önemli: ileridä birkaç suuk ay, sıcak için harçlar aylä büdjetlerinä ȇkonomiyayı getirer. Çoyu vatandaşlara deyni gelän kış vakıdında harçlar soruşu kaldırȇrlar: aylä büdjeti sıcaa, ȇlektroȇnergiyaya, imeyä, ilaçlara etecek mi?