Komratta geçti Gagauziya serbest güreşmesi çempionatı, o topladı sportçuları bütün regiondan. Yarışmalar geçerlär iki günün içindä Regional stadionunda. 100 sportçudan zeedä iki matta belli ederlär kendi aralarında en iileri.
Çoyu pay allanara deyni Gagauziya serbest güreşmesi çempionatı — bu ilk kaavı çeketmäk kendi karyerasında. Onnar göstererlär hazırlanmayı üüsek uurda, istemeyi taramaa hem sport karakterini kaavilettirmää. Tutturmaa uşakları geldilär trenerlär, analar-bobalar hem serbest güreşmeyi sevennär, bu sportun veterannarı. Gençlik hem sport bakannıın başın erinä çalışan Pavel Tulba urguladı , ani serbest güreş kalȇr en anılmış sport çeşiti Gagauziyada. Taa çok uşak gezerlär sport çevrelerinä, da bölä çempionatlar vererlär kolaylık göstermää kendini, kazanmaa eni becermekleri, hem yapmaa ilk adımnarını büük taramalara.
«Güreş — sport çeşitlerin birisi, angısı en anılmış Gagauziyada. Onun için bölä çok uşak gelerlär yarışmalara. Biz buna sevineriz»,- Pavel Tulba, gençlik hem sport bakannıın başın işini yapan, söledi.
Matta geçti kızgın güreşlär. Genç sportçular savaştılar göstermää, ne üürendilär sınışlarda. Herbir taramak — bu çok günnük trenerin hem güreşçinin işin çıkışları. Bu gün kimäsä uydu taramaa, kimi sä da tarattı. Nicä urguladı yarışmaların baş davacısı İlya Esir, burada kaavişer karakter, istemäk taramaya hem kazanılȇr eni becermeklär.
«Serbest güreşmäk ilerleer, bunu göreriz uşakların sayısından, 160 sportçu 13 yaşınadan hem 15 yaşınadan. Açan ileri biz çekedärdik, bizdä vardı 70-80 uşak. Şindi iki kerdeä taa zeedä. Bu bizi sevindirer»,- İlya Esir, yarışmaların baş davacısı, söledi.
Hazırlayıcılar nışannȇȇrlar, ani bölä turnirlär yardım ederlär ilerletmää sportu, belli etmää talantlı sportçuları. Gagauziya serbest güreş federaţiya başı Gadjı Guseynov nışannadı, ani federaţıyanın baş neeti — ilerletmää bu sportu regionda hem tutturmaa genç güreşçileri. Maasuz bölä yarışmalarda belli edilerlär çempionnar, angıları ileri dooru tanıttıraceklar Gagauziyayı hem Moldovayı devlet hem haklararası turnirlarda, urguladı federaţiya başı.
«Bu küçük uşaklar, bu bizim halkın gelecää. Neçinki burada koyulȇr sport ruhu, harakter, sanȇrım, ani bu uşaklardan, ileri dooru olaceklar üüsek uurda sportçular. Onnar bizi sevindireceklär»,- Gadji Guseynov, Gagauziya serbest güreş federaţiya başı, nışannadı.
Trenerlär urgulȇȇrlar, ani pay almak çempionatta- önemni ȇtap herbir uşaan sport yaşamasında . Nicä açıkladılar terbiedicilär uşaklara deyni bu büük becermeklär, onnar üürenerlär güreşmää, kontrol etmää kendi duygularını, saygı gütmää konkurentinä hem kazanmaa üüsek erleri. Bölä yarışmalar vererlär motivaţiya gitmää ileri| taa sıkı hazırlanmaa| urguladı serbest gereş treneri Sergey Stefu: «Bölä yarışmalar vererlär bizim uşaklara kolaylık göstermää kendilerini Gagauziya çempionatında. Büün uşaklar Kongazdan geçtilär iki çevrä, kims[ taradı, kimi s[ tarattı. İleri dooru bekleeriz taramakları».
Sportçular söleerlär , ani çıktıynan mata, bu her kerä dalgalanmak , ama sevinmeliktä. Çoyuna deyni serbest güreş — bu yaşamanın bir payı, da bölä uurda yarışmalar vererlär kolaylık diil sade denemää kuvedini sport uurunda, ama dostlaşmaa da.
«Bän geçirdim bir güreş, da tarattım, ama ii tarattım. Etişmedi tehnika hem kuvet bana».
«Bän pay alȇrım yarışmalarda, Gagauziya çempionatında. Büün bir güreş geçirdim, angısını tarattım. Sora benim konkurentim da tarattı».
«Büün pay aldım bu çempionatta, iki güreş geçirdim, taradım. İlk — pek kolaydı, ikinci taa zordu, ama taradım. İsteerim çıkmaa finala».
Gagauziyanın çempionatı serbest güreştä geçer iki günün süresindä. Onun çıkışlarına görä tarayıcılar kabledeceklär diplomnarı, ödülleri hem para baaşışlarını. Genç sportçularına deyni — bu diil sade güreşmäk ödüllär için, ama önemni adım gelecek üüsek taramalara.