Komrat stadionunda geçti Gagauziya futbol çempionatın finalı SAKSAN hem EKOLİEF komandaların aralarında. Oyununun sırasında kimi dartışmaklar oldular, nedän sora komandanın birisi bitirmedän oynuyu gitti sport meydanından.
Dinnenmäk günneri Komratta futbol oynunun sevennerinä deyni meraklı geçtilär. Merkez sport meydanında Dezginja küüyün EKOLİEF futbol toplum komandası hem Çadır Kasabasından SAKSAN komandaları buluştular. Herkezi neetlenärdi taramaa.
Vasiliy Kapsamun Dezginja küüyün primarı, EKOLİEF komandanın trenerı: «Umutlanȇrız, ani oyun meraklı geçecek. Hazırız güreşmää taramak için, bakmayarak ona, ani Gagauziya futbol çempionatında aşırıdan da, Afrikadan oynucular var».
Biz ceviz ayında başladık oynamaa. Grupada 5 komanda vardı, onnarın sırasından ilk olduk. Orta finalında GALLAKTİKA komandasınnan oynadık, taradık 2-1. Büün dä umutlanȇrız tarayalım».
Filipp Kadin SAKSAN futbol klubun administratoru: «Çok hazırlandık. İsteeriz gözäl oynuyu gösterelim. En önemli- yanışlıksız. Elbetki, isteeriz tarayalım. Bütünnä Gagauziya çempionatı neetli hepsi futbol oyunun sevennerini birleştirsin. Ki futbolu baksınar, ona oynasınnar, ilerlertsinnär».
İlk taym komandalar için 2-1 sayısınnan başarlandı. SAKSAN ilerdiydi. İkinci taymda kararlandı penalti urulsun Dezgincä küüyün futbol aullarına. Bu topu EKOLİEF komandanın vratari salverdi. Nedän sora nenormativ lafları için sarı kartoçkayı daavacıdan kabletti. Vratar kayıl olmadı bununnan, da onnarın aralarında dartışmaklar başladılar. Bitkidä, kırmızı kartoçkayı kabledip daavacıdan, EKOLİEF komandası durguttu oynuyu da gitti sport meydanından. Gagauziya futbol federaţiyanın başı Georgiy Sult, bu duruma verdi kendi komentariyasını:
Georgiy Sult Gagauziya futbol federaţiyanın başı: «Matç durgundu o üzerä, ki Dezgincä küyündän EKOLİEF komandası kayıl olmadı gollan, penaltidän sora. Oynucular daavacılan dartışmaa başladılar. Komanda sport meydanından gittilär. Çıkışa görä 3-1 komandaların aralarında kalȇr».
Nicä paylaştı Georgiy Sult, neetlän aaraştırmaa kabledilän durumu futbolcuların hem daavacının aralarında, onnar plannȇȇrlar danışmaa Moldova futbol federaţiyasına, ki onnar kendi kararını açıklasınar.