Gagauziya çiftçileri cümnä seslemeklerindä pay aldılar. Burada subsidiyalar nasıl ödenerlär hem eni tehnologiyalar nasıl kullanılêrlar annadıldı. Toplantıya Gagauziya çiftçileri hem Çiftçilik Bakannıın uzmannarı katıldılar.
Gagauziya subsidiya kanonuna diişmeklär yapıldı. Onun için subsidiya fondundan paraların kullanılmak kuralları da enilenerlär. Çiftçilär sayȇrlar, ani bu ilinnedecek onnarın işini. Bu toplantılar çiftçilerä yardım ederlär taa islää annamaa parayı nasıl kabletmää hem dooru kullanmaa, – dedi Kazayak küüyün çiftçi adamı Maksim Kol: «Bizim için meraklı bölä seminarlar, neçinki burada açık hem kolay annadêrlar subsidiya kolaylıkları için, angılarını bizä vererlär Çiftçilik Bakannıından».
Nicä nışannadı Gagauziya Çiftçilik bakanı Sergey İbrişim, agrariyalara deyni bölä seminarlar meraklı.
«Çiftçilär yavaş — yavaş bu işlerin önemniini annêȇrlar — en ilk , ani bu yasamak için önemni bölüm. Büün diil saklı, ani çiftçilik bölümü — özel eri kaplȇȇr, ayırı bizim dolayda, devletin üülen tarafı için»,- Sergey İbrişim nışannadı.
Maksim Kol annattı, ani subsidiyaların yardımınnan Çiftçilik kurumunda çok işlär başarıldı.
«Bitki yılda baalar diktik, su eri yaptık hem güneş panellerini koyduk. Bölä biz bütündän kullandık subsidiya kolaylıklarını»,- Maksim Kol annattı.
Toplantıda ayırı yapma intelektın kullanması çiftçılik uurunda bakıldı. Bundan kaarä — fidannar hem baalar için subsidiyaların zeedelenmesi, hep ölä da GPS- navigaţiya tehnikasın satın alması. Çiftçilik Bakannıında urgulêȇrlar, ani agrariyalar taa Sık eni tehnologiyalara geçerlär topraan işletmesi için hem tehnik tertiplerini enilederlär.
«Güz vakıdına yakın çiftçilär eni tertipleri aldılar — ekmää deyni no-till, strip-till tehnologiyalara görä. Bu kolaylıklar yardım ederlär topraa nem korumaa hem zeedelemää bereketi. Biz islää çıkışları bu uurda göreriz, kim artık bölä çalışêr, da subsidiya fondu buna yardımcı olêr»,- İbrişim nışannadı.
Çiftçilär söleerlär, er fondun neetleri uyarsaydı İlerlemäk bölümnerinnän, ozaman gelecektä da subsidiyaları kullanaceklar. 2025-ci yılda subsidiya fondunu 31 çiftçi kullandı. Bu neetlerä 5 million ley koyuldu, onnardan 3 million 970 bin ley kullanıldı. 2026-cı yılda subsidiya fondu genä 5 million ley kuracek.