Büün, oktäbrinin 6 — da, Gagauziya Bakannık komitetin sıradakı oturuşu geçti. İşin süresindä, Bakannık komiteti azaları baktılar 20 soruş, angıları baalı avtonomiyanın türlü sferalarınnan. Gagauziya Bakannık komiteti azaları baktılar oturuşta soruşu, geçirmäk için paraları avtonomiyanın cümnä medik — sanitar kurumnarına. Gagauziya saalı korumak baş bakanı bir vakıda işini götürän ALÖNA KOZAR haberledi, ani diişilmeklär baalı toplanmış paraların başka uurlara geçirmää, angıları taa ileri verildilär Çok — Maydan küüyün cümnä medik — sanitar kurumuna.
ALÖNA KOZAR Gagauziya Saalı korumak baş bakanı bir vakıda işini götürän
«Bakarak bu karara, Gagauziya Bakannık komiteti geçirdi Çok — Maydan küüyün cümnä medik — sanitar kurumuna 400 bin ley. Onnarın içindän 210 bin ley harcandı satın almak için labarator tedarıkları, 100 bin ley düzmäk işleri için, 30 bin ley gaz kotölu için hem da 60 bin ley — satın almak için tehnika. Onnar arttırdılar parayı kimi stayalara görä. Danıştılar cümläylän, ki arttırmış paraları remont işlerindän, sayıda 11 bin 287 ley hem 10 bin 246 ley, angılarını arttırdılar kotöl parasından, başka uurlara geçirmää — bölä nicä satın almak için elektrokardiografı, neçinki onnara o pek lääzımnı».
Gagauziya Bakannık komiteti başı ilk yardımcısı İLYA UZUN üürendi, nesoy paralar için laf gider.
İLYA UZUN Gagauziya Bakannık komiteti başı ilk yardımcısı
«Siz annadȇrsınız 400 bin ley için, ama burada bän görerim 210 bin ley. Sız sıralȇrsınız — kotöl, remont işlerini, kompyuter tehnikasını».
ALÖNA KOZAR Gagauziya saalı korumak baş bakanı bir vakıda işini götürän
«Onnara geçirildiydi 400 bin ley remont için hem satın almak için tedarıkları. Bitki — bitkiya, onnar arttırdılar 21 bin 533 ley 72 ban.Onnar isteerlär başka uurlara geçirmää satın almak için tedarıkları, kalan sa paralar, angıları etişmeyeceklär, onnar alaceklar kendi büdjetindän».
Yapmaa deyni kanonda diişilmekleri, Gagauziya Bakannık komitetin azaları seçtilär bir sestä. Gagauziya Bakannık komiteti temsilcileri baktılar başka da soruşları, angıları baalı büdjetlan, regionun soţial — ekonomika ilerlemesinnän, erli kuvetlerin işinnän hem da Bakannık komitetin zamandaş işinnän.