Gücük ayın 25-dä Gagauziya Bakannık Komiteti azaları sıradakı oturuşlarını geçirdilär. Oturuşun süresindä bakılan soruşlar baalıydılar avtonomiyanın cümnä-ekonomika soruşlarınınnan.
Bakannık komiteti azaların sıradakı oturuşun süresindä 2025-cı yılın bücet gerçeklenmesi raporu verildi. Gagauzya Finans bakanı Tatyana Doyçeva nışannadı, ani 2025-cı yılın büceti kabledildiydi 1 mld.566mln.306 buçuk bin gelirlerinnän, arçların sayısı da hep bu sayı uurunda kabledildiydilär. Yılın süresindä yapılan diyşilmeklerdän sora 2025-cı ılın bücet sayısı kurdu 1 mld 843 mln.989 bin ley gelirlär tarafından hem 1 mld.919 mln 847 bin 400 ley arçalar tarafından.
«2025-ci yılda gagauziya büceti gelirleri 1 mld.765 mln.274 bin 700 ley kurdular, ne kurdu 95, 7 %. Uydurarak 24-cü yıllan gagauziya büceti 210 mln leyä zeedelendi, ne kurdu 13 buçuk %. Gelirlerin payı 2025-cidä butürlü kuruldu: kendi gelirlerimiz 643 mln 942 bin 600 ley, ne kurdu 36 buçuk % gelirlerin bütün sayısından, Toplanılan gelirlär 32 mln.250 bin 700 ley, 1,8 %, Grant finansları 2 mln.7643 bin 900 ley, ne kurȇr 0,2%. Hep ölä transfertlar MD bücetindän üüretmäk kurumnarını , sport okullarını, cümnä ödemeklerini, yol infrastrukturasını finanlamaya. Arçlar kurdular 1 mld.86 mln.317 bin 600 ley»,- Tatyana Doyçeva nışannadı.
2025-ci yılın arşlar sayısı diyşilmeklerin geliştirilmesininnän 1 mld.753 mln.822 binley kurdu. Arçların finanslanması gerçeklenärdi alarak esaba ödeklerin önemini, nışannadı bakan.
«2025-ci yılda kassa arcamakları zeedelendilär şu kategoriyalarda:üüretim uuru 81 mln 785 bin 400 ley, cümnä koruntusu uuru 42 mln.787 bin 300 ley, Komunal izmeti 26 mln.775bin 600 ley, Ekonomika izmeti uurunda arçlar 16 mln 73 bin 900 ley, kultura, sport hem gençlik 15 mln 386 bin 200 ley»,- Tatyana Doyçeva nışannadı.
2025-ci yılın strukturası diişmedik kaldı. Ona girdilär 30 merkez büceti, 3 dolay büceti hem 26 primȇriya büceti, nışannadı Tatyana Doyçeva: «Bücetin gelirlär uurunun gerçeklenmesi 1 mld.451 mln.25 bin 600 ley kurdu, bu sayı plannanmış sayıdan taa zedä 115 mln.235 bin 600 leyä. Uydurarak 2024-cü yıllan gelirlerin bücetä gelmesi 160 mln.leyä zeedelendi. Bu bücetin en büük payı, neredän yapılȇrlar hepsi ödeklär. İsteerim nışannamaa, ani seftä merkez bücetindä toplanılan gelirlerimiz 400 mln leyi aykırladılar».
Oturuşun süresindä Gagauziya bakannık komiteti başın ilk yardımcısı İlya Uzun şükür etti hepsi ekonomika agentlerini hem yaşayannarı, onnarın bücet kurulmasında aktıv pay almakları için.
«Şükür ederim herbirini, kim pay aldı gagauz Avtonomiyası bücetin kurulmasında hem onu doldurmakta. İsteerim şükür etmää büük, orta hem küçük ekonomik agentlerini hem sırada yaşayannar.ı, angıları işledilär hem ödedilär hepsi vergileri. Bundan da kuruldu bizim bücetimiz. Saaolsunnar herbiri. Umutlanȇrız, ani bu yıl biz adımnayacez 400 millionu. Allaa versin yaamur, ko olsun bereket. Umutlanȇrız, ani yıl bereketli olacek»,- İlya Uzun şükür etti.
Temsil edilmiş rapor kabledildi Bakannık komiteti azalarınınnan hem ötää dooru bakılmaya hem kabledilmeyä GHT yollandırılsın lääzım. Bundan kaarä bücet gerçeklenmesi raporu lääzım cümnä seslemeklerindän da geçsin, nışannadı Tatyana Doyçeva.