Büün Gagauz Radiosu  26 tamannȇȇr. O  avtonomiyanın tanınmış sesi yaşayannara deyni oldu.Her gün efirdä haberlär, türlü programalar hem muzika yayınnarı var. Radioyu diil Gagauziyada, ama bütün devlet da sesleer.  Nicä çalışȇr radio kollektivi hem neylän yaşêêr – bunu bizim korr annadacek .

Gagauz Radiosu üç dildä yayın yapêr: rusça devlet dilindä hem gagauzça. Bu yardım eder taa da çok insanı kaplamaa hem bir vakıtta gagauz dilini hem kulturasını korumaa. Radionun ȇks- direktoru Mariya Parfönova söledi ki, bu yıllar  radio diil sade haber kanalı , ama bir cümnä dialogu insannarlan oldu.  

« Bän ayırarkana kendimä zanaat , hiç düşünmääzdim, ani bän jurnalist olacam, neçinki bän herzaman kriminalist istäärdim olıım. Ama belä oldu da bän düştüm radioya, da hem ilkin işledim diktor, soran da açan  teleradio daaldı, beni teklif ettilär burayı, ki açıım Radio barabar Lübov Kasımlan da 3 ayın içindä radio açıldı. En zoordu te o ani eniycä lääzımdı işlemää, neçinki türk delegaţiya uzmannarı gösterdilär nicä bizä işlemää. Ama açan onnar gittilär, biz kaldık kendi kendimizä nicä te o küçük uşaklar dayaksız. Ama da sevgi varsa işä –ozaman hepsi olarmış»,- Mariya Parfönova söledi

Radioda çalışȇr uzmannar, angılarına deyni  bu diil sade bir zanaat, ama iş , angısı sevgi, sabur isteer. Kollektiv için gagauz dilindä yayın yapmak pek önemni. Jurnalistlär çalışêrlar, ki gagauz dili, kultura hem adetlär yaşasın.

« Bizim radio işimiz çok meraklı. Hergün efirda çalışırkana eni becermeklär peydalanȇrlar, ii duygular, çok stress da var, bundan yok nasıl kaçmaa. Herbir efir o dalgalanmak , efirin çeketmesindan lääzım toplamaa kendini. Hepsi duyguları sıkı sıkı kilit altına koymaa olsun deyni hepsi ii, çünkü bizi sesleycilär sesleer Komrattan Valkaneşädan»,- Zinaida Efremova Gagauz radionun korespondenti söledi.

Herbir programanın vakıdında efirä çıkması hem kaliteli duyulması için tehnik uzmannarı da çalışêr. Onnarın işindän radiounun işi belli olȇr, angısını bütün Moldova devletimiz sesleer.

«Bän taa çok tehnik işinnän baalıyım. Bän hazır programaları vakıdında efirä çıksınar deyni  hem insannar onnarı seslesinnär deyni çalışêrım. Zor te o fikirdän, ki  seni bütün Gagauziya işider. Yannış yok nicä yapmaa, onun için herzaman dikkat olmaa lääzım»,- Pavel Arnaut Gagauz radionun ses rejisöru söledi.

Çoyu insana deyni radio hergünkü yaşamanın bir parçası kalȇr: еvdä, transportta yada iştä. Kimsä  haber için sesleer, kimsä muzika için. İnsannarın lafına görä, radio özel bir atmosferayı kurȇr.

«Birdä ikidä transportta gidärkän kocamnan sesleeriz,ayırı gagauz radiosunu.  En ilkin radio çalışannarına saalık hem sabur dilerim, neçinki bu diil ilin bir zanaat, hertürlü insannan onnar kaarşı geler. Onuştan çok saalık hem dayanmak onnara. Yaşayannara da üüsek uurda kef herzaman , yazı iicä hem dinnenmäk günneri geçirsinnär».

« Bendä herzaman radio açık. Haberleri sesleerim. Açan var vakıt muzikayı da  savaşȇrın seslemää».

«Allaa onlara saalık versin hem radio taa çok ilerlesin».

Büün Gagauz Radiosu avtonomiyanın önemli bir payı kalêr. O insannarı haberlärlänn, muzikaylan hem cannı efirlarlan birleştirêr. Radio evladları yakınnaştırêr hem gagauz kulturasını ilerledeer. Büün radioyu sade diil efirdä var nasıl işitmää, ama internet sayfada  grt.md dünnenin her tarafından.