Bucak kırlarından çok uzaklarda gagauz kulturası yaşȇȇr hem ilelerleer. Hareograf Eseniya Topal birkaç yıl geeri çıkȇr tekliflän Moskvada «Yıldız» gagauz oyunu kolektivini kurmaa. Büün bu iş verer kolaylık gagauzlara millet kendiliini yabancılıkta korumaa hem ilerletmää.
«Yıldız» kolektivi iki yıl geeri Kazayak küüyündän Moskvaya gelän Topal Eseniyaylan kuruldu. Kolektivin azaları Russiyada yaşayan gagauzların uşakları. Vatanından uzaklıkta bulunarak ta, onnar bulȇrla kolaylık dedelerinin adetlerininnän hem istoriyasınınnan baalantı tutmaa. Muzika, halk oyunnarı hem giimneri vererlär kolaylık genç oyunculara halkın istoriyasına deerindän daalmaa hem onu yabancılıkta üüsek uurda temsil etmää.
«Biz iki yıl geeri 6 kişiylän başladık. Büün bizdä şansora 30 kişi. Uşaklar havezlän bizä gelerlär, çünkü onnarın var kolaylıkları oyunnarlan zanaatlanmaa. Burada yabancılıkta, biz dedelerimizdän kalan sıcaklıı duymaa isteeriz. Uşakların arasında var öleleri, angıları gagauziyadan geldilär, amma var öleleri dä, angıları burada duudular. Onnar ana-bobadan kalan adetleri üürenmää hem ilelrletmää isteerlär»,- Eseniya Topal nışannadı.
«Yıldız» kolektivin sţenaya herbir çıkışı o diil sade horeografiya, ama diri istoriya, angısı adım atmasınınnan, elin örümesininnän annadılȇr. Gagauzların istoriyasını hem harakterini annatmaa yardımcı olȇrlar gagauz giiyimneri dä, angılarını Eseniya kendisi işleder hem diktirer.
«İlk 6 oyuncunun giimnerini bän kendim hazırladım hem diktim. Ama açan sıra geldi 10 karı, 10 da adam giimini dikmää , bana yardım eder Mariya»,- horeograf nışannadı.
Eseniya nışannȇȇr, ani onun baş needi diil sade üüretmää uşakları gagauz halk oyunnarına, ama kultura kendiliin koruması da. Vatanında uzaklıkta -bu iş pek önemni, nışannȇȇr Eseniya. Bölä iniţiativalar vererlär kolaylık yaşatmaa hem evladlara adetlerimizi vermää. Kolektivä gelän uşaklar Gagauziyanın çoyu yaşamak punktlarını temsil ederlär.
«Var Kazayaktan, Baurçudan, Kongazdan, Beşalmadan, Beşgiozdän, Çadır-Lungadan. Taa büüklerin arasında var Kongazçıktan, Dezgincedän. Pak sevinerim hem kısmetliyim, ani uşakların var kolaylıkları biri birinnän lafetmää, baalantı kurmaa»,- Eseniya söledi.
Büün «Yıldız» kolektivi üüsek uurda temsil eder gagauzların kulturasını çokmilletli devlettä. Onnarı sţenaya herbir çıkışı annadȇr hem gösterer, ani yabancılıkta da Vatanını hem kulturayı sevmää, korumaa hem ileletmää var nicä, nışannȇȇrlar kolektivin pay alannarı.
«Bän «Yıldız» kolektivinä ilk uşaklarlan bilä geldim. Bän burayı iki yıl şansora gezerim».
«Bän gagauz oyunnarınınnan yarım yıldan zeedä zanaatlanȇrım. Pek sevdim hem hodulluklan burayı gelerim».
«Biz büün Russiyada yaşȇȇrız, amma adetlerimizi hem kulturamızı korumak, bizä deyni pek önemni».
Büün «Yıldız» kolektivi o bir köprü, angısı evladları birleştirer hem annadȇr, ani kuluranın sınırları yok.