«Gagauz kilimnerin gergefleri katalogta» kiyadın tanıtımı Haydar küüyündä geçti. Kolverim iki dildä çıktı – rus hem rumın dillerindä. Tiraj 500 ȇkzemplär kurdu.
Katalogun avtoru hem aaraştırıcısı Anna Kiosä-Haydar küüyün Kultura evin başı. Kendi işindä o gagauz kilimnerin korafların simvolikalarını, kompoziţiyaların istoriya maanalarını açıkladı.
«Katalogta var kilimnär ȇlementleri, ornamentlär. Biraz istoriyadan, biraz da teoriyadan»,- Anna Kiosä açıkladı.
Оrnamentlär Gagauziya muzeylerindän hem insannarın özel kolekţiyalarından alınma. Var çok kilim, angıları bir resimdä gösterili hem angılarını biz alışıkız görmää.
«Маterialı bütün Gagauziyadan topladık»,- katalogun avtoru ekledi.
Besarabiya halkları için, özellillän dä gagauzlar için, kilimcilik — o diri anmaklar, şıralı, açık renklär hem meraklı ornamentlärlär, içendeliindä avtor yazȇr. Katalog gagauz halkın varlıın tradiţiyalarını korutmaa hem ilerletmää. Katalog 19-20 asirlerdä el işlerin ornamentlerini kaplȇȇr. Onun sorumnuunu küüyün primarı İlya Kösä açıklȇȇr: «Katalog çok material uşaklarımıza verer, ki kilimcilik tradiţiyaları paalılıkları unudulmasınnar».
Ȇkspediţiyalarda pay aldı hem gagauz kilimnerin ornamentlerini aaraştırmaa avtora yardım etti Haydarın istoriya hem dolay muzeyin başı Alla Kapsamun: «Katalog verer kolaylık görmää Topraamızın angı muzeylerindä nesoy ornamentli kilimnär var, nesoy gergefleri bizim insannarımız kullanarmıştılar».
Kilim kırmaa becermäk analardan kızlarına geçärmişti. Bunun için kızlar küçüklüündän bilärmiştirlär kilim kırmaa, söleerlär Haydar küüyün anılmış kilimciykaları İrina hem Valentina.
«Вenim uşaklıımda sade güllär korafları kilimnerdä gösterilärdilär».
«O vakıt herbir evdä kilim kırmak düzeni durardı».
Katalogun tanıdılması bütün cümneyä deyni taa bir adım millet kulturasını korutmaa oldu.