Hederlez ayın 18-dä Halklararası muzeylär günü nışannanȇr. Gagauziyada büünkü gündä 13 muzey var . Var ölä muzeylär, angılarında sevgi Ana topraana, istoriyaya hem adetlerä taa küçüklüktän terbiediler. Bölä Çok-Maydam küüyü «Yıldızçık» uşak başçasında terbiedicilär, ana-bobalar birkaç yıl geeri seçtilär karar mini muzey kurmaa.
Çok-Maydan küüyü «Yıldızçık» uşak başçasının kendi muzeyi var. Terbiedicilerin, ana-bobaların kuvedinnän, üürenmäk kurumun odaların birisi halk adetleri hem istoriyası koruması köşesi oldu. Bu işi gerçeklemää, uzmannar çoktan düş güdärdilär, nışannadı Çok – Maydan küüyün «Yıldızçık» uşak başçasının gagauz dili üüredicisi Anna Arabacı: «Bu fikir bizdä peydalandı çoktan, çünkü bizim analar, bobalar bizä türlü evelki predmetleri getirdilär. Biz dä bizim müdürümüzlän düşündük, ne var nicä yapalım, nereyi erleştirelim, ki uşaklara olsun kolay onnara yaklaşmaa, görmää, elinä almaa, diimää onnara».
Burada toplu gagauz halkının yaşamak tertipleri, dikmä peşkirlär, dokumalar, patretlär hem çok taa meraklı tertiplär. Hepsi halkın istoriyasını annadȇr. Muzeyin eksponatları sayısı gün-gündän zeedelener, nışannadı Anna Arabacı: «Deyecez, bu evelki rubaları, bu jakedi getirdi bizä Tetrioglo Goşa, onun babusu kararlamış bizä vermää bu giimneri. Başkası da çok işleri getirdilär- patretlär, dorojkalar, ikonalar ».
Uşaklar ana-bobalarlan may hergün getirerlär muzeyä eni eksponatları, angıları nezamansa onnarın aylelerindä kullanılarmışlar, nışannadı üüredici.
«İsteerim sölemää, ani onnar büük havezlän katılȇrlar, onnar kendileri gelip, söleerlär, ani bu maşinkayı biz kullanmȇȇrız, acaba ne yapalım onunnan . Vak çok kasnaklar, angılarını bizä getirdilär ana-bobalar, onnar bizim yanımızda burada dikmää dä üürenerlär»,- nışannadı Anna Arabacı.
Üüredicilär açıklȇȇrlar, ani kultura varlıına sevgi hem onu korumaa lääzımnık duyguları uşaklara küçüklüktän terbiedilsinnär lääzım. Bu muzey büük diil, ama uşaklara deyni o halkının istoriyası pençeresi gibi oldu.