Gagauz halkının en büük zenginnii-onun yaşayannarı. Gagauzlar anılȇrlar dünneyä musaafirciliklän, işi sevmäklän hem kulturalarına sayıp olmaklan. Beşalma küüyü yaşayanı Mariya Kasap diil çoktan kendi 75-ci yıldönümünü nışannadı. Büünnän büün o, ana-bobadan kalma adetleri hem zanaatları ilerleder.
Mariya İvanovna Kasap Beşalma küüyün çiftçi aylelerin birindä dünneyä gelmiş. Gagauz halkının ecelindä kara hem aydınnık sayfalarının taa çoyunu görmüş hem aklısında tutȇr. En pek ama onun aklısında 1946-ci yılın aaçlıı kalmış.
«Bendä vardı 5 kızkardaş. Bän en küçüktüm ayledä. 46-da, açan geler aaçlık, benim 3 kakum: biri 12 yaşında biri 6, biri dä 3 yaşında geçiner. Bir gündä hepsi. Yokmuş ne isinnär aaçmışlar. Mamu hem aalardı, hem annadardı, ani sabaylen sokaktan geçärmiş bir kızak, da o 3 kızını birdän koymuş kızaa. Var türkü dä ölä: «Kızak dolu 100 kişi, ardına gider 1 kişi» . Pek çok gençlär geçinmişlär»,- dedi Mariya.
Mariya İvanovnanın aylesi anılmış diil sade küüydä, amma aşırıda da, bobasının elindän herbir iş gelärmiş.
«Mamum işläärdi kırda, başçada çok işledi, bobam sa ustaydı. Pravleniyayı, selskiy sovedi küüydä yaptı, gitti Ţelinaya kazanca. Hem da benim bobam 35 yıl kemença düünnerdä çaldı. Diil sade bizim küüyün düünnerindä-ne Başküüyü kaldı, ne Kongaz. Taa Kazayakta 30 düünü var, angılarında o çalmış kemençäylän»,- dedi Mariya İvanovna.
Türkü Mariya İvanovnanın yaşamasında taa küçüklüündän var. Büüdüynän kararlamış yaşamasını onunnan baalamaa. Büün Mariya Kasap Beşalma küüyü «SEDEF» kollektivin azası. Sevgi kulturaya, incäzanaata onun üreendä büünnän büün yaşȇȇr, hem o hertarafça onu ilerleder.
«Kakum çok çalȇr hem çok türkü biler. Bän dä çok evelki türküleri bilerim, biz pek çok bileriz. Anam türkücüydü, çalardı pek gözäl türküleri. Sıralarda tätü çalardı kemençedä, o da aazdan»,- dedi Mariya İvanovna.
Var Mariya İvanovnanın başka zanaatları da. Örnek gibi alalım, ani o büünnän büün her gün tanteli örer-bu zanaatı da anasından kabletmiş.
«Bän onu her üülenniktä örerim, bän basmacık örerim, bän dermi örerim . Var geniş tantelim dä. Girip ev içinä televizoru koşȇrım, kendim dä örerim. Bir üülenniktä var nicä bir basmacık öreyim»,- dedi Mariya İvanovna.
Tantelili tertiplerdän kaarä, Mariya İvanovna gegeli kukaylan pala da öreer.
«Bän bir gecedä yarım pala öreyim yakışȇr. Kimär sıra uyanȇrım 3-tä da sabaadan uyumȇȇrım, alȇrım, kızım, da öreerim. Onnar hepsi gecä işi, bendä gündüz işi yok. Çünkü ev işleri hepsi benim üstümdä»,- dedi Mariya İvanovna.
Hergünkü ev izmetlerindän hem zanaattlarından kaarä Mariya İvanovna Beşalma küüyü «SEDEF» kollektivin aktiv pay alannarın biri. Burada halk oyunnarını , türkülerini, evelki zanaatları ilerletmäk yaşamaa da ihlam verelär , nışannȇȇr Mariya İvanovna: «Bän orayı kaçarak giderim, bän beenerim—pek beenerim!»
Diil çoktan Mariya İvanovna Kasap nışannadı kendi 75-ci yıldönümünü. Bu insanın energiyası, yaşamaa hem yaratmaa istemesi herbirinä ihlam verer.