Gagauziyanın Mariya Maruneviç adına bilim- aaraştırmak merkezindä ofiţial açıldı gagauz dilini ilerletmäk salonu- önemni kultura — üüretim proekti, angısı doorudulu korumaa hem üürenmää ana dilini. İniţiativanın aslıya çıkarmasında yardımcı oldu Gagauziyanın bakannık komiteti.
Olaya katıldılar kuvet temsilcileri, bilimcilär, üüredicilär merkezin uzmannarı hem cümnä temsilcileri. Eni erin açılması önemni bir olay region için, neredä milli özelliklerin hem ana dilin korumasınnan baalı soruşlar prioritet olȇrlar. Biz açȇrız diil sade gagauz dilini ilerletmäk salonunu- biz açȇrız eri, neredä işidelecek ana lafı, neredä dirileceklär adetlär hem da verileceklär evlad boylarına, söledi Gagauziya BAM başı İrina Konstantinova: «Açȇrız diil sade salonu, açerız salonu gagauz dili ilerlemesindä. Bu bir köprü akademiya bilimciliin hem onnarın kim sever ana dilini aralarında. İsteeriz hepsi bilsin, sevsin hem üürensin gagauz dilini. Bunun için BAM çalışȇr hem çalışacȇk ta».
Merkez olacek platformaylan bilimcilerin, üüredicilerin, ana-bobaların birleşmesi için, diri dialogun, barabar çalışmasının hem kararların çözülmäk yolların bulması için erlän. Birleştirip uzmannarın, üüredicilerin hem ana- bobaların bilgilerini hem becermeklerini biz var nasıl kuralım kaavi temeli gagauz dilin gelecää için, angısı ötecek aylelerdä, okullarda hem cümnä yaşamasında, nışannadı Gagauziya bakannık komitetin başın ilk yardımcısı İlya Uzun: «Bizim daavamız yapmaa ölä, ki herbiri bilsin gagauz dilini hem sevsin onu. Bunun için Gagauziya lääzım ii koşulları kursun – elektron platformalar, kiyatların tiparlanması hem taa başka. Bunun için biz durgunmayacez, ama ileriyadooru işleyecez. Gagauz dili salonu o önemni bir adım. O insannar, angıları burada çalışȇrlar örnek gibi gagauz dili hem kultura ilerlemesindä»
Merkezin açılması milli dillerin tutturmasında devlet politikansının önemni bir payı. Bu adım, angısı doorudulu korumaa hem kaaviletmää milli özelliklerini, söledi MD Üüretim ministerliin milletlär arası ilişkileri izmetin başı İvan Duminika: «Gagauz dili geçti zor hem uzun yolu aazdan halk adetlerdän doludan predmetädän uşak başçalarda okullarda kolecalarda hem universitetta. Bu zaamet- üüredicilerin, bilimcilerin, yazıcıların hem onnarın kim sever dili da inanȇr, ani o lääzım yaşasın hem ilerlesin. Büün biz diil sade dili koruyerız, biz kurȇrız koşulları onun ilerlemesi hem populärizaţiya için. Da salonun açılması önemni bir adım bu uurda».
Merkez olacek baş instrumentlän gagauz dilini ilerletmäk programasında- işleyan mehanizmaylan, angısı dolduracȇk strategiya plananrını konkret proektlarlan, iniţiativalarlan hem çıkışlarlan. Bu iş için sölerlär üüredicilär hem BAM uzmannarı.
«Sanȇrım, ani merkez çok fayda getirecek bizä, kim işleer, kim sever gagauz dilinikim geler başka devletlerdän. Düşünerim, ani burada türlü olaylar geçeceklär- konferenţiyalar, tombarlak masalar. Bilim-Ararştırmak Merkezi genişlendi da Mariya Maruneviç ideyalar aslıya çıktılar.»
«Gagauz dili lääzım ilerlesin. Biz kurduk avtonomiyayi diil çekişmää, ama ilerletmää kendi kulturamızı, ki bizim için bilsinnär devlettä, dünnedä, ki biz lafedelim ana dilindä, bizi annasınnar hem biz onu koruyalım.»
«Bilim merkezi büük iş yaptı. Bu erä geleceklär uşakalr, üürenicilär, studentlär. İsteerim gezintilär gagauz dilindä geçsinnär. Baş neet uşaklarlan lafetmää. Burada çok material var diil sade uşakalr için, ama onnar için da kim bilim uurunda çalışȇr. Burada pek uygun, islää. Ko bu merkez faydalı olsun hem çalışsın.»
«Bu oda diil sade duvarlar. Bu odada çalışacek insannar, angıları kendi ana dili lääızm kaldırsınnar taa üüsek uura, taa derindän. Utanmayalım onda lafedelim. Bilim merkezi yıllarlan çalışardı.»
Gagauz dilini ilerletmäk salonun açılış olayında musaafirlerä temsil ettilär üüretim programaları, işlettirilmiş metodikaları hem plannarı barabar çalışmasında okullarlan hem uşak başçalarınnan. Eni merkez lääzım olsun diil sade üüretmek meydanınnan, ama ana dili korumak simvolunan, angısı oler Gagauziyanın kultura varlıın önemni bölümünnän.