Gagauz bilimindä eni bir başarı- Haydar küüyü F.Angeli adına gimnaziya başı N.Koçanji doktorluk disertaţiyasını korudu. Kendi arıştırmasında Nadejda Panteleevna “V-IX klaslarda üürenicilerin gagauz dilindä söz ilerlemesi psihologiya hem pedagogika temeli”- problemasını derindän açıklȇȇr.
Nadejda Koçanji 30 yıldan zeedä gagauz dili hem literaturası üüredicisi işleer. Bununnan bilä her gün uşakları taa başarılı üüretmää hem havezlendirmää deyni türlü enilikleri arȇȇr. “V-IX klaslarda üürenicilerin gagauz dilindä söz ilerlemesi psihologiya hem pedagogika temeli”- problemasını derindän kendi doktorluk disertaţiyasında açıkladı.
«Yolun uzunnuu 6 yıl sürttü, 4 yıl üürenmäk hem iki yıl korunmak vakıdı. Pek meraklı bir zaman geçti. Havezi üürenmeyä bendä açtı, başımı iilderim, İvanna Dmitrievna Bankova. O beni getirdi bu yola, o koydu, dooruttu bu yola. Bütün 6 yılda biz Canabisininnän erleştirdik konţepţiyayı hem işledik barabar»,- nışannadı Nadejda.
Disertaţiya araştırmasında Nadejda Koçanji söz ilerlemesini psihologiya hem pedagogika tarafından açıkladı. Avtor nışannȇȇr, ani söz ilerlemesi diil sade türlü metodikaları kullanmasından, ama uşakları havezlendirmäklan , üüredicilerin hem ana-bobaların destäännän.
«Google formada anketalamak oldu. Onda Tomay, Beşgöz, Baurçu, Çadır okulların uşakları pay aldılar. Toplam 180 üürenici hem onnarın anaları-bobaları. Onuştan sçz durumu belli oldu taa ozamannar . Sora bän benim kolegalarıma verdim onnarı kullanmaya»,- Nadejda Koçanji açıkladı.
Aaraştırmanın çıkışları okullarda gagauz dilini üüretmäk proţesini taa başarılı gerçeklemesinä temel olsunnar yakışaceklar, sayȇr Nadejda Koçanjı: «Öncä şükür ederim Gagauziya BAM, ani onnar yardım gibi üüredicilerä çıkardı. Üüredicilerdä var kolaylık bulmaa, okumaa hem kullanmaa hergünkü işindä».
Doktorluk disertaţiyasının temasını araştırmak hem korumak bütün pedagogika ortamının ilerlemesinä destek olacek. Avtor nışannȇȇr, ani onun maanası gagauz dili sözünü ilerletmektä hem milli kulturanın kaavilenmesindä- paasız.