Komratta eni dekorativ-informaţioya obyektin “Gagauz çotrasının” açılışı geçti.  3 metralık çotra Komratta kasabasının merkezindä bulunȇr. Onun baş daavası musaafirlerä hem yaşayannara informaţiyayı  vermäk hem gagauz kulturasınınnan tanıştırmak. 

Turistik obyekti “Gagauz çotrası” dünnä turizm gününä karşı koyuldu , angısı sentäbrinin 27-dä bakıȇr. Bu çotranın içindä bulunȇr ȇkran, angısında bilgilär dolay için , onun gözellikleri , anılmış erleri , önemni olayları yaşayannara gösterilecek, açıkladı Gagauziya Bakannık Komiteti başın ilk yardımcısı İlya Uzun. 

İLYÄ UZUN Gagauziya Bakannık Komiteti başın ilk yardımcısı

“Büün biz eni turistik erini açȇrız. O büük diil, ama bizä deyni pek önemni. Büün biz barabar gagauz simvolinu açȇrız. Gagauz çotrası, angısı bizim adetlerimiz için hem kulturamız için annadȇr”.

Komrada deyni çotrayı koymak eri prinţip olarak seçildi, o bulunȇr kasabanın merkezindä, neredä onu hem yaşayannar hem musaafirlär göräbileceklär.  Kasaba primarı Sergey Anastasov nışannadı , ani bu ideya desteklendi çünkü çotra diil sade kulturayı göstersin, ama temsil eder Regionumuzu şarapçılık adetleri tarafından da.

SERGEY ANASTASOV Komrat kasabası primarı

“Çotra yaşayannarın halını kaldırȇr. Düünnerä teklif ederlär çotraylan. Hem elbetki, bizim halkımızın üzüm büütmesi hem şarap yapması kulturası bununnan sıkı baalı.  Çiftçi bakannıı hem Bakannık komiteti danıştılar bizä , ki biz belli bir er bu uura verelim, biz dä o saat kayıl olduk, bu pek gözäl bir fikir”.

Proekti gerçekleyennär çotrayı diil sade dekorativ obyekti gibi yapmaa istedilär.  Onda  herbiri zamandaş kolaylıklar yardımınnan turistik informaţiyasını kabletsin yakışacek. Bu ţifra formatında gerçeklenecek nışannadı Gagauziya ekonomika ilerlemesi hem turizm bakanı Larisa Çerven.

LARİSA ÇERVEN  ekonomika ilerlemesi hem turizm bakanı 

«Gagauzlara deyni çotra musaafircilik, açıklık hem saymak  için. Onun için biz yaptık burada bu çotrayı. Ama bu çotra diil nicä başka çotralar. Onun içindä bizim kulturamız , adetlerimiz, vakıdımız hem geleceemiz dä».

Musaafirlerä deyni eni obyekt -o Komradın merkezindä eni hem görümnü bir er olacek. Organizatorlar  umutlanȇrlar, ani burada yaşayannar hem musaafirlär unudulmaz fotoları yapabileceklär. Bundan kaarä kasabada o  billi bi orientir gibi olacek.

«Bizi çaardılar bu olaya , bu açılışa, da bän sanȇrım , ani bunu çoktan düzmää lääzımdı. Hepsi geçän — gelennär var nasıl onu görsünnär». 

«Çotranın inceliklerini biraz bilerim. Onu birsoy fidandan yapmaa lääzım, dooru onunnan işlemää , içini  eridilmiş mumnan dökülderlär.  Bunnar hepsi yapılȇr , ki çotra şişmesin».

«Biz sanȇrız, ani bölä olaylar bizim adetlerimizi ilerletmää yardımnȇȇrlar, ki insannar taa deerindän bizim dolayımızı üürensin.  Biz “Düz- Ava” kolektivin oyuncuları pek sevineriz, ani bu olayın bir payı gibi olduk.  ».

Bölä obyektlär nicä “Gagauz çotrası” infrastrukturanın bir payı olȇrlar. Kasabaya gelän musaafirleri karşılȇrlar.