Geçän dinenmäk günnerindä Çadır-Lunga kasabasının stadionunda Moldova Futbol Çempionatının 2 Liganın ikinci turu matçı geçti. FK «Saksan» kendi meydanında Drokiya dolayından «Ţargrad» takımını kabletti. Oyun sayılan 1:0 başarıldı. Meydanın çorbacıları taradılar.
Matçın ilk minutlarından meydanda sert hem gergin oyun vardı. Saksan topu taa çok tuttu, kaavi atakaları yaptı, ama musaafirlerin tokatlarına çok vakıt topu uramadılar, vardı çok gol momentleri. Birinci taym 0:0 sayılan başarıldı. Matçın kaderi 88-ci minutta çözüldü. Daniil Zlatovçen topu dooru uruşlan yolladı Ţargrad komandanın tokatlarına, da Saksan komandasına ilk puanı getirdi. Klubun prezidenti Grigoriy Kadın dedi, ani matç pek zor geçti, ama takım önünä koyulan neetleri aslıya çıkardı.
GRİGORİY KADIN FK «Saksan» prezidenti
«Açık söleyim, pek zordu. Siz da gördünüz, konkurent komanda kuvetliydi. Ama biz dayandık hem golumuzu da yaptık.»
Bakmadaan yapılmış gola, matçin bitki minutlarında oyun tuttu siiredicilerin meraklıını taa oyunun sonunanadan. Musaafirlär aaradılar kendi şanslarını almaa revanş, ama çorbacıların korunması hem vratarin ustalıı vermedilär onnara şans.
NİKOLAY SARİOGLU FK «Saksan» treneri
«Oyun iyi geçti. Meydanın her tarafında üstün oynadık, ama ataklarımız ya autlan başarılardı ya vratar topu tutardı, hepsi iiydi, biz taradık, sanȇrım biraz taa çok şansımız olsun lääzım. Çocuklar işledilär, nicä profesionallar da yaptılar beklenän golu.”
Saksan futbolcuları da söledilär, ani ensemäk kolay gelmedi, ama komanda için pek önemli oldu.
«Hemen hepsini yaptık. Komanda kuvetliydi, onun için oynamak zordu. Ama biz taa çok atak yaptık hem oyunu kontrol ettik. Şindi biraz ara olacek. Gelecek turu geçirecez. Futbolcular dinnenecek, ondan sonra taa da güçlü dönecez oynamaa.»
Ţargrad takımı için Drokiya dolayından matçın sonunda kaçırılan gol üzücü oldu. Ama musaafirlär nışannadılar , ani alaceklar çok faydalı işleri bu oyundan.
SERGEY BOGÄN FK «Tsargrad» kapitanı
«Plannarımızı, angılarını koyduk önümüzä, hemen hepsini yaptık. Ne yazık ki matçın sonunda golu kaçırdık tokatlarımıza. Komanda çok güçlü, üüsek ligalarda oynamış futbolcular var. Biz da tempı tuttuk. Ama bu futboldur: biri kazanêr, biri kaybeder. Komandalara ii başarılar dilerim. Biz eni takımız, onun için başımızı kaldırıp yolumuza ileri gideriz. Uzaktan geldik, taa Drokiyadan. Ama bişey yapmayacam, tarattık .»
«Çok ii bir oyun oldu, savaşçı bir oyun oldu. Biraz şans bizä uymadı, ama bu futbol — biri enseer, biri kaybeder. Bizim neetimiz birinci eri almaa. Ama görecez, çempionat uzun olacek, onun için elimizdän geleni yapacez.»
İkinci turda aldıynan üç puan, FK «Saksan» ikinci ligada kaavi gider turnir tablonun ilk sıralarında. Gelecek turuna takım geçirmeyecek, çünkü Atakidän komanda çempionattan çıktı. Ondan sonra Saksan Leova takımına karşı oynayacek.