Çadır kasabasında geçti FENİKS üçüncü zanaat festivali, angısı adalıydı Gagauz halk ustaların birliin 19-cu yıldönümünä. Burada 45 pay alan toplandı bütün Moldovadan — Komrattan, Taraklıdan, Kişinövdan, Gaydardan, Başküüdän, Çadırdan hem Pridnestrovye regionundan.
«Feniks» zanaat sergisindä gösterildi halk ustaların işleri — aaçtan masalar, sofralar, dokuma palalar, türlü kendi elinnän yapılan boncuklardan gözelliklär, ev tertipleri hem çok başka işlär. Ustalar kendi zanaatları için annattılar hem paylaştılar duygularınnan.
«Gençlär görsünnär nelär yapȇrlar taa büük insannar da onnar da alsınnar, görsünnär da üürensinnär onnarda biraz tutmaa evelki işleri da kalsın onnara nesä göstersinnär uşaklara».
«Pek lääzımnı göstermää, kalsın bizdän başka evlad boylarına».
«Feniks» festivali- o diil sade sergi yada yarmarka, o pek önemni bir adım halk ustacılıın ilerlemesindä hem zenginnenmesindä, dedi Gagauziya halk ustaların birliin başı Nikolay Kroytor: «19 yaşında oldu bizim asoţiaţiyamız Halk ustalar birlii hem bän düşünerim, ani ilerledecez hem savaşacez bizim bu ustacılıı göstermää, ani Gagauziyada, Moldovada var büük ustalar, hem savaşacez, ani ustalar kendi zanaatını, kendi bilgisini versinnär gençlerä, neçinki bizä lääzım ipcääzı koparmamaa, ani ötää dooru ilerletmää».
Gagauziya halk ustaların birlii kuruldu 2006-ci yılda. Şindiki vakıtta bu kurumda 80 ustadan zeedä var.