Beşalma küüyündä bitki yıllar sport birdän ilerlemää başladı. Bunun için öndercilär herbir işi yapmaa savaşȇrlar. 2025-ci yılda seçildi karar uşaklara sport zanaatlanması için koşulları kurmaa.
Sport kompleks, neredä büün küüyün uşakları sportlan zanaatlanȇrlar, 50 yıl geeri düzüldü. Bitki 30 yılın süresindä amma binanın 80%-di dura-dura daaldı, kurtarabildilär sade bir sport salonunu, angısını iki yıl geeri eniletmää başladılar. Büün burada sportlan hepsi isteyennär zanaatlanȇrlar, nışannadı primar Valeriy Moş: «Pek çok uțak bizä geler. Her afta pazertesindän 3-är sıra aftada, ușaklar gelerlär 3-är saada . Var kızçaazlar da. Biz pek sevineriz, ani ana-bobalar bizi destekleerlär hem uşaklarını bizä getirerlär».
İki yılın süresindä sport salonunda koyuldu serbest güreş için tedarlıklar, binayı yısıtmaa başladılar.
«Her yıl biraraz para koyȇrız .İki yıl geeri sport okulu filialı açıldı 2023-cü yılda yaptık serbest güreş için salonu. 40 uşak bizä gelerlär. Var trener, angısı bitirdi üürenmesini da üüreder uşakları»,- dedi primar.
Bu yıl küüyün nasaatçıları seçtilär karar 2025-ci yılın kapital investiţiyalarını sport salonun koşullarını düzmeyä doorutmaa. Burada düzüleceklär ellerini yıkamak tertipleri, hem rubaları diişmäk odası-bunu yapmaa deyni, sport sekţiyasının treneri danıştı.. Uşakların gigienesı terbietmenin önemni bir adımı, nışannadı primar.
«Geçti yıl o danıştı bizä bir büük problemaylan, ani şindiki istediklerä görä, uşaklarda ellerini yıkamak odası lääzım olsun. Biz bu yılkı kapital investiçiyaları 231 bin ley, kararladık bu uura vermää»,- nışannadı Valeriy Moş.
Yıkanmak hem rubaları diişmäk odasını düzmäk işlerini neetledilär kısa zamanda başlamaa, ki eni üürenmäk yılınadan başarmaa. Beşalmanın uşaklarına deyni ii koşulları kurmak — o diil sade infrastrukturayı düzmäk, ama uşakların saalıına hem küüyün geleceenä investiţiyalar, nışannadı primar.