Komratta estetika gimnastikası turnir-festivali geçti. Onda pay aldılar devletin üülen tarafından 250 sportçudan zeedä.
Estetika gimnastikası uurunda turnir-festivali «Brilliance Academy» sport klubunnan hazırlandı hem geçirildi. Onda devletin üülen tarafın yaşamak punktlarından 250 spotrçudan zeedä uşak pay aldılar. Herbir uşak gösteräbildi gimnastika becermeklerini üüsek uurunda, nışannadı «Brilliance Academy» estetika gimnastikası klubun öndercisi Anna Kudreţ: «Bu turnirdä pay alȇrlar hepsi bizim filiallarımız , herbir yaşamak punktundan. Büünkü gündä bizdä 3 filial var: Kongazda, Komratta hem Taraklıda. Büün bizä geldilär musaafirlär Valkaneştän hem Kıpçaktan da. Bu yortu birleştirer talantlı uşakları, angıları üüsek urda gimnastikaylan zanaatlanȇrlar. Uşaklar okadar pek bekleerlär bu yortuyu, ani büük hodulluklan hem havezlän ona her yıl katılȇrlar».
«Kaarcazkalar paradı 2025» turniri «Brilliance Academy» estetika gimnastikası sport klubunnan geçirildi. Desten gagauziya Gençlik hem sport bakannıından da verildi. Trenerlär nışannȇȇrlar, ani bu sport çeşidinnän zanaatlanmaa isteyennerin sayısı yıl-yıldan zeedelener. Uşakların taa çoyu deyni da «karcazkalarparadı» o bir önemni kolaylık kendi becermeklerini gösterip, taa üüsek urlara çıkmaa.
«Estetika gimnastikası taa sorumnu olȇr. Pak sevineriz, ani turniri Gagauziyada geçirmää başladılar da bizä lääzım olmȇȇr devletin taa poyraz tarafına gitmää. Pek islää, ani uşaklara veriler kolaylık göstermää kendi becermeklerini»,- Oksana Hergeledji, «Graţiya Dȇns» kolektivin öndercisi, Valkaneş kasabası, nışannadı.
Ekaterina Çeban, «Brilliance Academy» klubun Taraklı filialı treneri, nışannadı: «Bıkmayacam sölemää, ani pek önemni ki bizim uşaklarımız sportlan zanaatlansınnar. Gimnastika kızçaazlarda ilerleder onnarın gözelliini. Onnar diil sade taa gözäl, amma taa saalıklı da olȇrlar».
Trenerleri hem ana-bobaları uşakları bu uurda terbietmeleri için Gagauziya öndercileri adından Gençlik hem Sport bakanı Väçeslav Dragoy şükür etti: «Bitki yıllarda estetika gimnastikası taa sorumnu olȇr. Büün o var çoyu yaşamak erlerindä, hem gelän yıla taa birkaç filial açılacek. Bu yıl turnirä katılannarın sayısı şaştırȇr. Ana-bobalar, uşaklar hepsi burayı gelmişlär. Estetika gimnastikasınınnan uşaklar taa uşak başçasından zanaatlanmaa başlȇȇrlar hem taa saalıklı da olȇrlar».
Turnirin payalannarı hem enseyenneri kablettilär medalileri, diplomaları hem baaşışları. Turnirin kurucuları açıkladılar kendi umudunu, ani bu olay her yıl geçirilecek hem yıl-yıldan taa çok sportçu toplayacek.