Eski işlär, ilk bakışa, geçmiş için var kolay çok annatsınnar. Komartta yaşȇȇr butakım istoriyaların koruyucusu – Mariya Arnaut. O toplȇȇr evelki predmetleri, enileder onnarı, belli ki angılarını var kolay kurtarmaa. Şindi Mariyanın gagauz odasında iki evelki enilenmiş sandık. Herbiri onnardan, eni giimindä, şindiki istoriyasını başka bir soyda ömürünü ilerledecek.
Büük sandık kendi düülmüş demir ȇlementlerinnän hem gergeflerinnän birdän dikkatlıı çeker. Ama enilenmäk formasınadan okadar da ii halda diildi. Sandıın eski kuvedini usta hem adam elleri çevirdilär-kimi remont işleri becermekleri istedi. Sade bundan sora Mariya sandıın iç hem dış üzünä tutundu. Evelki sandıı o koyu-mor rengä boyadı, düülmüş demirleri hem gergefleri boz renktä boyadı. Butakım dekorativ paylar belli oldular, mebel dä görümnü oldu.
МARİYA ARNAUT usta
«Ölä razgeldi, ani düştü bizim evä bir eski sandık da düşündüm düzeyim kendi evimä, nicä kolaylıım var. Te bu sandıı, açan sıra geldi düzmää bacaa çürüktü. O aar, da lääzım oldu birkaç kişi. Kapaa biraz iiricä durardı, diiştirdik baalamalarını, enserleri. İkinci sandıı komşuyakamız geçindi da dedilär istärsän al onu. Onu da düzdük, neredä böceklär imişlär, bacaa çürümüş da isteerim onu da düzmää».
İkinci sandık – taa küçeräk hem dekorsuz. Ama ona da Mariya düşündü eni yaşamayı baaşlamaa. Boyadıktan sora, kapaan üstünä hem önünä trafarettän resimi çıkardı. Butakım kolaylık predmetin individuallıı belli etti.
МARİYA ARNAUT usta
«Vardır boyadıyım öncä üç sandık, koyu mor rengi beendim. Da onun üstündä var nicä yapasın biyaz, boz, altın renklärlän resimnär. Sandıı boyadıynan düz mor çemberleri, bakacez, düşünecäm nesoy renktä boyamaa».
Büük sandıın artık var eri. Gagauz odasında onun üstünä üklükäk konacek. Bunun için o interryer payı taa olacek hem halkın tradiţiyalarını akıla getirän mebel. Ama te ikinci sandıın misiyası nesoy olacek Mariya taa düşünmedi. Önemli o, ani ona eni ömür verildi. Mariya için – bu aaçtan tertiplärlän, demirlän, boyaylan işlemäk sade diil. O kolaylık predmetleri korumak, angıları istoriya, kultura payları, angılarını kaybetmää düşmeer.
МARİYA ARNAUT usta
«Eniledärsäk, uşaklar tutaceklar aklılarında da beki onnar da kullanaceklar. Sevinerim, ani yaptım da kullanacam, da başkasına da gösterecäm».
Büün evelki predmetlär taa sık başladılar zamandaş interyerin payı olmaa. Butakım insannar da, nicä Mariya, onnarın dış görümnüü koruyarak- anmayı o insannar için koruyȇr, kim çok yıl geeri var olan mebeli kullanmışlar. Bekim dä herbir enilenmiş sandık, mebel yada ev avadannıı-o taa bir küçeräk istoriya, angısına veriler şans eni ömürü başlatmaa.