Kırbaalı küüyündä ver bir er, angısı yaşayannarı toplayıp, birleştirer. Millet köşes neredä dedelerdän kalma istoriya hem büünkü sıcaklık bir erä gelerlär.
Gagauziyanın en küçük küüyündä Kırbaalıda millet köşesi, dolayı istoriyasına sevgiylän kuruldu. Büün burayı var nicä gelsin herbir insan hem vakıdını milli özelliinnän geçirsin. Millet köşesindä korunȇrlar gagauzların evelki adetleri. Bu erin hodullu gagauz fırını, angısı dedelerimizin sobacılık adetlerinä görä düzüldü, nışannȇȇr küüyün bibliotekacısı Konstantin Gaydarji.
Proekt taa 2019-cu yılda gerçeklendi, amma Koronavirus Pandemiyası arayaa girdii sebepindän, milli köşesini aktıv kullanmaa sade bir-iki yıl geeri kullanmaa başladılar. Büün bu er diil sade gözelletsin küüyün merkezini, amma adetleri korumak simvolu gibi olȇr. Bu fırında küüyün büük yortularına kurban imekleri, kıırma hem başka milli imeklär pişirilerlär, nışannadı Konstantin Gaydarji.
Fırından kaarä burada yapıldılar masalar da, angıları örtü altında yaamurlu havalarda koorunȇrlar. Bundan kaarä, yaşayannar yaamurlu havada kendilerini burada taa raat duyȇrlar.
Kırbaalının milli köşesi, büün küüyün istoriyasını hem yaşayannarın ev sıcaklıını birleştirer, vereräk kolaylık genç evlatlara saymaa hem ilerletmää milli zenginniklerini.