Programalar, angıları yardım ederlär profesional tarafından eni bilgileri hem zanaatları kabletmää, kısa vakıdın süresindä avtonomiyada işleerlär. İniţiativa yapılȇr alarak esaba iş zanatların sorumnuunu hem verer kolaylık insana kısa zamanda kabletmää becermekleri, angıları lääzımnı iş bulmasında.
Komrat kasabasının zanaat okulunda geçerlär kısa vakıtlık kursalar, angıları doorudulu kvalifikaţiya kaldırmasına hem eni sorumnu zanaatların kabletmesinä. Kurslara üürenmää deyni kursant lääzım 18 yaşından taa büük olsun. Üürenmäk birkaç uura görä geçiriler, nışannadı zanaat okulun başı Evgeniy Buzadji. Onun laflarına görä programalar işlettirildilär ölä, ani kursantlar hızlı sınaşsınnar iş panayırın eni koşullarına. Üürenmäk intensiv formatında geçer- derslär afta arası geçerlär, ama praktika dersleri uçilişenin odalarında geçirilerlär.
«Bu yıl kısa vakıtlık hazırlamayı geçirdik ölä zanaatlara görä nicä avtomehanik altı ay üürenmeklän hem elektrik tertiplerin düzülmesindä elektrik beş ay üürenmäklän. Avtomehaniklerin grupasını kontrakt temelindä hazırladık hem onnara dokumentleri verdik. Pazertesi günü bitki ekzameni verdi hep avtomehaniklerin grupası, ama onnar geldilär bizä iş verän agensvosundan. İki afta geeri elektrik tertiplerin düzülmesindä elektrik zanaatında kişilär ekzameni verdilär, onnar beş ay üürendilär . Onnar da zanaatı kablettilär iş verän agenstvosunun yardımınnan»,- nışannadı zanaat okulun başı Evgeniy Buzadji.
Yazılmaa eni zanaat kabletmäk kursalara var nasıl hepsi isteyennerdä- nicä genç uzmannara ölä da kim isteer diiştirmää zanaatını yada kendi becermeklerini taa ii yapmaa kısa zamanda, söleer Evgeniy Buzadji: «Gelän yılın şansora kablettik hem kaavilettik üürenmäk plannarı. Orada olacek taa iki zanaat- elektromontajları yapan uzman altı ay üürenmeklän hem üç aylık kursalar marangoz zanaatında».
Kursalar bittiynän pay alannar kablederlär sertifikatları, angıları belli ieder kabledilmiş kvalifikaţiyayı, ne öndercinin laflarına görä üüselder konkurentlik kolaylıkları işi aararkana.