Aydar küüyün çiftçi kurumunda geçti seminar, neredä gösterdilär hem annattılar, nicä kullanmaa eni tehnologiyaları agrar sektorunda ilkyaz hem güz ayazlarında. Tütün şaşkası yapılı Moldovada ȇkologiya tarafından pak komponentlerdän.
Aydar küüyündä Uzun Zinaidanın çiftçi kurumun meyva başçasında regionun agrariyalarına gösterdilär eni tehnologiyayı , angısı koruyȇr başçaları ayazlardan. Erlem gecä soluun temperaturası iner 3 gradus sıfırdan aşaa, ozaman bu tütün şaşkası var nasıl korusun fidannarı. Ama soluun temperaturası taa iisiksä, ozaman o da yardım olmayacek söleerlär uzmannar. Ȇkspertlerin laflarına görä bölä tehnologiyaların kullanması verecek kolaylık agrariyalara arttırmaa para hem taa efektiv korumaa gelecek bereketi. Nicä söledi eni metodun kurucusu Radu Tudos tehnologiya insana deyni korkunçsuz, yok kötü elementlär tütündä, hem onu var nicä kulanmaa diil sade meyva başçasında, ama baalarda, tepliţalarda, hem açık toprakta zarzavatlarda.
Radu Tudos, çiftçilik uzmanı, nışannadı: «Bizim şaşka tütündän kaarä verer 80 gradus sıcak çıkarkana, bu sıcak soluk. Bundan kaarä o verer parafin efektini, angısı kaplȇȇr fidannarı hem koruyȇr. O işleer iki kuvetlän, o koolȇr suuk soluu başçadan, kaplȇȇr onu sıcak soluklan, da bu verer ii ȇfekt. 30 minut o kolverer sıcak soluk, soram da taa iki-üç saat koruyȇr fidannarı ayazlardan».
Eer temperatura gecä yada çin saabalen taa aşaa düşecek, var nasıl taa bir kerä kulanmaa onnarı. Bir ektara lääzım koymaa 7-10 şaşka söleerlär ekspertlär. Onnarın laflarına görä en önemni korumaa bereketi. Bu yıl may hepsi meyva başçaları zararlandılar 50-70 proţenda ayazlardan. Eni tehnologiyaların kullanması verecek kolaylık azaltmaa rıskleri çiftçilik bölümündä, nışannȇȇr agrariyalar.
Zinaida Uzun, çiftçi kurumu başı, Aydar söledi: «Düşünerim, ani eni tehnologiyaları var nasıl kulanmaa, pek uygun hem ii. Düşünerim, ani biz dä alacez bu şaşkaları, taa az işçi, bir kişi geldi, yaktı hem kontrol etti. Erlem iki saada sa bu pek ii, ama ayaz taa çok tutacek, enidän onnarı kullanacez hep bu gün çin sabaalen. Neçinki biz da, nicä başkaları, çobannardan alȇrız saman da yakȇrız diil bir yıl».
Georgiy Radov, çiftçi kurumu başı, nışannadı: «Bu tehnologiya diil eni, biz onu unuttuk çoktan, ama bu şaşkaları çocuklar enilettilär, gösterdilär, nicä bu hepsi işleer, göreriz, ani 20 minut şindän tüter , kaplȇȇr başçayı pek sıkı. Biz dä deneyecez, neçinki bu yıl var 17 ektar erik, hepsi dondu, meyva yok, ama harcamaklar büük budama, serpmää, beslemää, berekettä yok».
Vadim Dülger, çiftçi kurumu başı, Kiriet-Lunga, söledi: «Var abrikos başçam, ama bereket bu yıl toplamadım, hepsi dondu. Deneyecez eni tehnologiyayı, da görecez çıkışları».
Nicä nışannadı Agrar bakanı Sergey İbrişim , devletin poyraz tarafından kollegalar gösterdilär tehnologiyayı, angısını kendileri yaptılar, da umutlanȇrlar, ani yardım edeceklär agrariyalara bu zor vakıtlarda.
«Tütün kaplȇȇr başçayı hem koruyȇr ilkyaz ayazlarından, var nasıl güz ayazlarından da korusun, bu mal pek lääzımnı, neçinki bizim agrariyalar üçüncü yıl karşı gelerlär ayazlarlan , bu yıl onnarın beterinä gordilär kayıplara 78 million leydän zeedä. Onun için bu var nıcä olsun ii örnek, ki bölä kayıplar olmasın deyni»,- nışannadı İbrişım.
Sergey İbrişim nışannadı, ani hepsi agrariyalar, kim komisiyaylan birerdä belli ettilär kayıpları, kabledeceklär subsidiyaları devlettän yakın 50 yada taa zeedä proţent kayıbın bütün sayısından.