Beşalma küüyündä başladılar hazırlamak işleri taa bir sokak düzmää deyni. Gagarina maalesinin yolu düzülmedi taa küüyün temellenmesindän beeri.Arada-sırada burayı çibönka sepelärdilär, amma bu durumu doorudardı sade ilk büük yaamuradak. Bu yıl bu problemanın çözülmesi için seçildi karar erli yollar fondun finanslarını doorutmaa.
Küüyün öndercilii informaţiyasına görä , Gagarin adına maalenin yolunu düzmesi için karar küüy nasaatçılarınınnan kabledildi. Bu yolun düzülmesi verecek kolaylık başka maalelerin yaşayannarına da kolay hem hızlı Beşalmanın baş maalesinä, Leninan sokaana çıkmaa, nışannadı primar Valeriy Moş: «Açan büük ayında biz nasaatta kararladık angı maaleleri düzmää, seçtik bu maaleyi. Bu yolu düzmää deyni birkaç sebep vardı-biz burada hiş bir sıra da düzüntäcälük işlerini geçirmedik. kimär sıra biraraz çebönka daadardık, ama bir büük yaamurda genä herersi batak olardı. Onuştan biz düşündük, ani bu yolu lääzım yapmaa , ki yılara unutmaa, ani burada problema var».
Proektin gerçeklenmesinä erli yol fondun 2025-ci yılın finanslarını doorudaceklar. İşleri neetlenerlär birkaç aftada başarmaa.
«Bu yolun aşaasında Kolhoznoe hem Mina Kösä maaleleri, o insannar da buradat lenin sokaana çıkabileceklär taa reet. Yakın 80 ev bu yolu kullanacek»,- dedi primar.
Yolu düzmää taa başlamadaan seçildi karar bu maaledä bütündän su trubalarını da diiştirmää, nışannadı primar: «Burada vardı bir problema, ama biz onu 2-3 afta öncä açıkladık. Biz seçtik karar buradan eniletmää su trubalarını, ki yolu yaptıynan sora genä kazmamaa hem yolu bozmaa olmasın».
Gagarina sokaa küüyün poyraz tarafında bulunȇr. Bu yolun düzülmesi taa bir önemni adım küüy infrastrukturasının düzülmesindä. Yıllar boyunca burada yaşayan insannar büük yamurlarda hem kaarlarda zorluk çekärdilär. Yolu duzmektän sora onnar raat-raat yakışaceklar buradan gezsinnär, lääzımnı obyektlerä gitsinnär. 4 metralık geniş yol brusçatkadan olacek, proektä görä burada yaamur sularını sapıtmak kanalları da yapılaceklar, nışannadı primar .