Kongaz küüyündä Todur Zanet adına liţeyindä geografiya kabineti enilendi hem açıldı. İnteraktiv kartalar, globuslar hem televizor — hepsi var, çocuklar taa ii üürensinnär deyni, deyeer üüredicilär. 

Musaafirleri liţeydä adetä görä  karşıladılar — ekmeklän hem tuzlan. Açılıştan sora herkezi akt zalına geçti, orada olayın ofiţial  payı başladı.  Direktor Marina Çebanovа dedi, ki okulu unutmayan başarannar var,  sţenadan çok şükür lafları sölenildi insannara, kim  ilerleder yardımı okula.

«Bugün bizdä   enilenmiş geografiya kabineti var. Bu iş bir insanın hatırınnan oldu — bizim liţeyin başaranınnan. O gösterdi ki, okullan baalantı  bitmäz,   çıktıynan,  olduktan sora da. Da bu insan, angısı korudu diil sade ii duyguları şkola için, üüredicilär için, ama  yaptı büük faydalı hem lääzımnı işi»,- Marina Çebanova liţetin başı nışannadı. 

Kabinetin  düzmesinä harcamakları hem donatılmasını  Mihayıl  Karaseninin tarafından yapıldı — o başardı bu okulu çok yıl geeri. O urguladı, ani uşaklarda lääzım olsunnar ii koşullar üürenmää deyni. 

«Biz okulun başınnan görüştük, plan yaptık hem birliktä bunu gerçekleştirdik. Okul bizi hep destekledi. Çekettik kurmaa planı. Da siz büün göreceeniz ne bizä uydu yapmaa birerdä lıţeyın başınnan, yardımcılarınnan, angıları bizä yardımcı oldular»,-  meţenat nışannadı.

Gagauziyanın üüretim bakanı  Nataliya Kristeva dedi ki, bu örnek başkalarına da ilham veräbilir. 

«Çok teşekkür ederiz. Bu iş başkalarını da ihlam eder.  Açan görerim, ne yapmışlar, canım seviner. Bizdä Komratta da   var başarannar, angıları kabinetleri düzerlär. Bu — gerçek patriotluk örneyi nicä taa ileri söledilär sizin uşaklarınız. Bu en ii çıkış, terbietmedä. Maasuz bu çekiler ayledän»,-  Nataliya Kristeva dedi.

Üürenmäk kurumunu bu yılların içindä binnän uşak başardı, da onnara pek önemni  ki büünkü üürenicilerdä olsun taa ii koşullar.  Liţeyın başaranı Demyan Karaseni isteer ki, uşakların  taa çok kolaylıkları  olsunnar üürenmäk proţesında.

«Üüredici — çok büük laf. Da inanın beni, siz şimdi taa hızlı büümää isteersiniz, ama sora bu yılları sevgiylän hatırlayacaksınız, angılarını geçirdiniz bu okulda. Da her gün  kabledip eni bilgileri, siz gidersiniz o neetä, angısını koydunuz önünüzä»,- Demyan Karaseni dedi.

Kutlamada başka misaafirler da söz aldılar. Onnar urguladılar, ki bu büük iş  olacek başkasına da örnek. 

«Okul diişiler, gözellener. Çocuklar için burada ii koşullar var. Şimdi başka  vakıtlar, ama okadar çok sevgi koyulȇr. Bilersiniz burayı girdikçä  seviner canın, ani uşaklarda ii koşullar kurulu, onnarın var kolaylıkları üürenip,  becerikli insan olsunnar».

«Bu kabinet sizä yardım edecek üürenmeyä hem insan olmaa. Açan koyduk kartayı, şafk, angısı ondan gelärdi , sanȇrım verecek sizä kolaylık üürenmää hem taa becerikli olmaa».

Kongaz küüyünün primarı Mihail Yesir da teşekkür etti insanı, angısı koyup kendi kyvedini hem finansları, eniletti geografiya kabinetini. 

«Bu çok ii örnek. Umutlanȇrım başka insanlar da bölä yardım edeceklär kendi üürenmäk kurumnarına. Düşünerim, ani büünkü gün okul  taa ii olȇr, da çeker diil sade büünkü üürenicileri, ama kim onu başardı da»,- Mihail Yesir  nışannadı.

Sora kırmızı şirit kesildi. Çocuklar geografiyadan bilgilerini da gösterdilär.  Eni kabinetta  eni tedarlıklar, kartalar hem başka lääzımnı üürenmää deyni işlär peydalandı.  Uşaklar yazdılar gelecää mektupları, angıları korunaceklar okulda, da çok yıl geçtiynän var nicä onnarı alıp okusunnar. Hep ölä uşaklara tatlılık verdilär hem başka baaşışları. 

«Eni kartalar var, taa ii  yardım edeceklär  er  üzünü annayalım. Üürenmäk taa kolay oldu. Biz şindi var nasıl  interaktv tabloyu da kullanalım».

«Geografiya çok interesli — dünneyı tanıyȇrsın evdän çıkmadaan, eni erleri, devletleri üürenersin, derslär da taa meraklı olȇrlar. Bän tutȇrım aklımda nesoydu burada kabinet, da uydurarak  şindikiyaän, pek gözäl hem ii. Bän pek sevinerim, ani bizdä oldu bölä kolaylık, da bizim odamız enilendi».  

«Geografiyayı bän pek beenerim, neçinki üürenersin  çok meraklı işleri, çıkmadaan devlet aşırı. Bölä taa ucuz da, meraklı da. Eni kabinet çok güzäl, burada üürenmäk hoşuma gider». 

«Bän sayȇrım, ani bu klasta uşaklar  var nicä kabletsinnär eni bilgileri çok yılların süresindä».

Bu  eni kabinet — sade bir baaşış diil, bu geleceyä yapılan  bir investiţiya. Mihayıl Karaseninin örnää gösterer, ki insan köklerini unutmȇȇr hem kendi okuluna yardım eder, urguladılar olayın musaafirleri.