Gagauziyada belli oldular en ii uşak başçaları, angıları üüsek çıkışları kendi işindä kazandılar. Onnara diplomnar hem para premiyalar verildilär. Taa derindän Nat. Andrieş.
İlk eri reytingta aldı uşak başçası Çeşmä küüyündän. Üüsek çıkışları için kolektiv kabletti diplomu hem para premiyasını 15 bin ley. Bundan kaarä uşak başçası kabletti taa bir diplom hem premiyayı beş buçuk bin leya gagauz dili kullanmak sferasının genişletmesindä. Kurumun başı Dora Rişilän nışannadı, ani bu yıllar üredicilär yapardılar hepsini ki uşak başçası en ii sayılsın.
«Bän şükür ederim kolektivimi. Neçinki nesoy da ideya yada teklifi bän açıkladım onnar hazırlıklan büük cuvaplıklan hem havezlän yapardılar hepsini. Bendä halizdän birleşik komanda, angısınnan bän var nasıl hem ateşä hem suya nicä deerlär. Kendi kolektivimä söleerim çok saa ol.»
İkinci erdä iki yasla- Kıpçak küüyün 4-cü uşak başçası hem Komrat kasabasının edinci uşak başçası. Üçüncü eri pay etti birkaç kurum- Çadır-Lunga kasabasının birinci uşak başçası, Komrat kasabasının beşinci yaslası hem Beşgioz küüyün uşak başçası. Hep ölä belli oldular kurumnar, angıları dördüncü eri aldılar. Diplomnarı kablettilär Çadır kasabasının 8-ci yaslası hem Komrat kasabasının 9-cu uşak başçası.