Haydar küüyün ustaların birisi – Valentina Moşoglo. O palaları dokuyȇr düzendä, angısı kayınnasından kalmış. Herbir pala – o zaamet, sabur hem ustacılık, dokuma işin herbir santimetrasına koyulu. Eski, ama taa kaavi düzendä işlemää lääzımnı diil sade beceriklik, ama malı duymak ta. Siiredärkenä dokumak işini görersin, ani iplik sıra-sıra koyularak pala peydalanȇr. O da evin bir payı olarak, yıllarca var nicä izmet etsin.
VALENTİNA MOŞOGLO usta
«Hem maşınkada var nicä yıkamaa. Ne mayaçnäy ipliklerdän çıkmȇȇrlar, ne dä parçalardan onnarı çok yıl var nicä kullanmaa».
Büünkü gündä evdä dokuma palalar hep taa sorumnu kalȇrlar, söleer Valentina. Onnar interyer donaa sade diil, palalar dedelerimizin evcimannıını aklımıza getirderlär.
«Yapȇrım 1,5 metralık palaları, 2 m. İnsan angılarını beener, onnarı da alȇr».
Usta söleer, ani Haydarda pek az usta bu uurda çalışȇr. Te bunun için Valentina sayȇr, ani evelki dokuma ustacılıını önemli ilerletmää hem gelän evlad boylarını üüretmää.
«İki-üç kişi küüdä dokuyarsa, başka da kalmadı. Bundan sora da lääzım üüretmää taa gençleri. Kim isteer, gelsinnär üüredeceäm».
Zanaatı korumak- o Ana topraan istoriyanın bir payını korumaktır. Valentina Moşoglo düzendä tradiţional palaları dokuyarkana, palalara eni yaşamayı verer.