Daava Gagauziya Halk Topluşun eks-başına Dmitriy Konstantinova cezayı belli etti. Ona verildi 12 yıl kapan o beterä,ani iş erindä bulunarak o geçti lääzımnı koşulları -soruş paralarlan baalı. Hep ölä da daava yasak etti ona beş yıl bulunmaa ayırı işlerdä hem 46 million leyi çevirmää.
Bu kararın okunmak vakıdında Konstantinov daava salasında yoktu. Onun advokatı Viktor Kılçik haberledi,ani Dm.Konstantinov bolniţada bulunarmıştı o üzerä daavaya gelämemiş. Poliţiya ofiţial uurda aaramakları haberledi. Ceza kararına görä Dmitriy Konstantinovu lääzım bulsunnar, tutsunnar da versinnär poliţiya uzmannarına.
Nicä nışannadı Gagauziyada prokurorun işini götürän Nikolay Levandovskiy, Dmitriy Konstantinov kararın belli edilmesindä yoktu. Buna görä onu aaramaya verdilär. Şindiki vakıtta poliţiya uzmannarına yapêrlar hepsi lääzımnı işleri bu uurda.
«Belli edilän karara görä, Dmitriy Konstantinov kabaatlı bulundu 84-cü statyaya görä — ona verildi 12 yıl kapan hem 46 million ley o lääzım cevirsin. Açan geçti daava oturuşu, neredä açıklandı cezalamak kararı, Dmirtiy Konstantinov yoktu oturuşta. Onuştan büünkü gündä onu aaramaya verdilär hem yapêrlar hepsi işleri, ki onu bulmaa deyni»,- Levandovskiy nışannadı.
Moldova Genel Poliţiya inspektoratın başı Viorel Çernêuţanu söledi, ani kararın belli edilmesinädän Dmitriy Konstantinova yasak edilmedi gitmää nereyi sä. O söledi,ani ölçülär, ne yapaceydı poliţiya Dekabr ayın 26-nädän, doorudulu D. Konstantinov için, olaceydı diil dooru da kanona görä bakılaceydı.
«Sadece bir yasaklık yapıldı Dmitriy Konstantinova — o yoktu nicä Moldovadan sınır aşırıya çıksın. Ama başka kararın belli olmasınadan, o bütün Moldovada vardı nicä bulunsun. Hepsi ne yapılaceydı o vakıt poliţiya uzmannarınnan, olaceydı kanon bozulması, sora uzmannara cuvaplık olaceydı»,- Viorel Çernêuţanu söledi.
Prokuraturada nışannadılar, ani Dm. Konstantinovun daava işini 3 yıl aaraştırdılar. Materiallar daavaya 2025 yılda mayda verildilär. Dekabrinin 26-da dаava kendi son kararını belli etti — Konstantinovu 12 yıla kapamaa. Daava işin kararında söleniler: «Konstantinov Dmitriy Georgieviçä 12 yıl kapan vermää kapalı penitenţiar kurumunda ne bakılı Moldovanın 72-ci statyanın 4-cü payında. Hep ölä 5 yıla yasak ediler bulunmaa ölä iş erlerindä, nicä zararı yapmak vakıdında. Ceza vakıdın sayılması başlasın o vakıttan, açan Dmitriy Konstantinovu bulaceklar».
Dm. Konstantinovun advokatı haberledi, ani daava işin motivaţıya tarafını üürenerlär.
«Nicä belli oldu, daava işin kararı dekabrinin 30-da avşam üstü açıklandı. O 352 sayfada yazılı. Bu kararda yok bir dä cuvap bizim soruşlarımıza. Daava bir dä cuvap vermedi o faktlara, angılarını biz bildirdik. Belli ki, biz apelläţıyayı verecez kısa zamanda. Biz eminiz,ani bu diil bitki karar, bu sade çeketmesi, nicä da onda , ani kimin hakını bän açıklȇȇrım, onun kabaatı yok»,- Viktor Kilçik, Dmitriy Konstantinovun advokatı, nışannadı