Кomradın regional istoriya-dolay muzeyindä «Dikkatlık karılara» tombarlak masası geçti. Oluş Halklararası karıların gününä adalı. Onda pay aldılar aaraştırıcılar, kultura çalışannarı, öndercilär. Temalar açıkladılar Karıların cümnedä, kulturada, gagauz halkın yaşamasında rolünü.
Selemneşmäk sözünnän pay alannara hem musaafirlerä buluşmanın kurucusu Кomradın regional istoriya-dolay muzeyin başı Valentina Dermenci. O urguladı karıların büük erini cümnenin ruh varlıın korumasında hem zamandaş cümnenin ilerlemesindä. Karıların önemliini kultura varlıın, tradiţiyaların korumasında belli etti Kultura bakanı Marina Semönova: «Gözäl temaları tombarlak masaya seçmişiniz hem islää, ani onu Halklatarası karıların gününä karşı geçirersiniz bu buluşmayı, çünkü herbir karının kendi adı hem kendi istoriyası var. Hepsi karılarımızı gelän yortuylan kutlȇȇrım, kısmetli olunuz».
Buluşmanın tematikalı payını açarkana, P.Draganov adına bibliotekanın baş bibliotekacısı Evgeniya Lülenova incäzanaat ustacılıında karıların süretlerini açıkladı.
«Karılar her zaman adamnarı kahramannaa ihlam verärdilär – muzıkacıları da, peetçileri dä, skulptorları da. İlk Toprakları açarkana, aaraştıcılar karıların adlarını verärdilär. Karı herkerä evin koruyucusu sayılardı, o ocaan sıcaklıı hem şılaa»,- Evgeniya Lülenova açıkladı.
«Politika hem yaradıcılık karı ecelindä» temasını GHT ȇks-spikeri Anna Harlamenko ilerletti. Kendi sözünü hazırlanmış yazılarından okudu.
«Politika – o karı soluu, yaradıcılık – o sinir, orada duymaa lääzım »,- Anna Harlamenko açıkladı.
Özel meraklan Arnaut Mariyanın sözünü pay alannar sesledilär. Usta kendi pano yaratmalarını teklif etti hem gagauzkaların halkın tradiţiyaların, adetlerin korumasında işini belli etti.
Mariya Arnaut usta: «Düşünmedim, ani nezamansa kendimi halkımın tradiţiyalaranı kendimi uracam».
Tombarlak masa dialog formatında geçti.