Avgustun 24 — dä Moldova devletin Parlamentin azaları ikinci okumakta kablettillär diişmekleri seçimnär kodeksinä, angılarına görä Gagauziyada seçimnär geçeceklär eni kurallara görä. Onnar dorudulu ona, ki seçimnär geçsinnär açık, dooru. Kanon proektini tutturdu 52 deputat. Nesoy diişmeklär için laf gitti üürendi Polina Barbova.
Moldova devletin Parlamentin azaları avgustun 24 — dä ikinci okumakta baktılar proekti, angısı baalı diişmeklärlän Seçimnär kodeksinä. Dokladı okudu Parlamentin deputatı PAS partiyasından İGOR KİRİYÄK. O açıkladı, ne için olȇrlar diişmeklär: proekt çalışȇr Konsituţiya davanın kararına görä, angısı geçti 2026 — ci yılın iyülün 9 — da kabledildi.
İGOR KİRİYAK MD Parlament deputatı PAS partiyasından
«Proekt doorudulu yapmaa deyni seçimneri Konstituţiya davanın kararına görä, angısı kabledildi neetlän kurmaa hem geçirmää Gagauziyada seçimneri».
İgor Kiriyäk getirdi aklımıza, ani avgustun 5 — dä Moldova devletin seçimnär kodeksın proektin diişmekleri için geçtilär cümnä seslemekleri, nicä Kişinöv ölä da Komrat kasabalarında.
İGOR KİRİYAK MD Parlament deputatı PAS partiyasından
«Konsultaţiyaların geçirilmeleri Komrat kasabasında baalıydılar Gagauziya Halk Topluşun seçimnerinnän, nasaat edilmiş normalara görä».
Merkez Seçim Komissiyası kayıl oldu proektlan, ama taa cümleleri giriştirdi. Onnarın arasında, ondan karä, ani geçirmää regionun seçimnerini hem da Gagauziyanın Merkez Seçim Nasaatın işini, ayırı esaba alındı deputatların sayısı Gagauziya Halk Topluşun görevinä.
İGOR KİRİYAK MD Parlament deputatı PAS partiyasından
«Merkez Seçim Komissiyası notalȇr kanon iniţiativayı, nicä zamandaş hem da lääzımnıını, kaavileştirmää deyni seçimnär proţesini, nışannayıp, ani cümlelerin çoyu alındılar esaba proekttä. Bununnan barabar seçimnär bölümü giriştirdi taa cümleleri, angıları baalı avtonomiyanın seçimnerin geçirilmesinnän, Gagauziyanın Merkez Seçim Nasaatın işini, Gagauziya Halk Topluşun deputatların sayısını, hep ölä Seçimnär kodeksın tehnik — üridik soruşlarını».
Deputat Gri̇gori̇y Uzun açıkladı paketi dokuz diişmeklärlän, angıları hazırladılar Gagauziya Halk Topluşun pozıţiyasınnan — seçimnär bölümnerin sayıları, imzaların toplamaların sırası, Komratta «Юг»Apeläţiya palatanın mandatların inandırmaları. Seçmektä diişlmeklär için lääzımnı seslär alınmadılar.
İGOR KİRİYÄK MD Parlament deputatı PAS partiyasından
«Saygılı önderci, saygılı kolegalar, komissiya kabletti dorutmakların ikinci punktunu, angısına görä, 68 — ci statyada, ilk payında “Merkez Seçim Komissiyasının” laflarından sora ekli tekst Gagauziya Merkez Seçim nasaatı” adı. Kalan cümlelär komissiyada geeri uruldular».
Moldova devletin Parlamentin deputatı ALEKSANDR BERLİNSKİY nasaat etti eklemää 21 — ci statyaya eni payı, ama bu dorutmak geçmedi.
ALEKSANDR BERLİNSKİY
MD Parlament deputatı “Partidul nostru” partiyasından
«Saygılı önderci, saygılı kolegalar, bän yalvaracam siz tutturasınız dorutmayı, angısı baalı, ki 21 statya ekli olsun eni paylan, maasuz edinci paylan, bän onu okuyacam: ani kişi, angısı geçän Merkez Seçim Komissiyasının mandatında götürdü öndercinin işini, onun yardımcısının yada komissiyanın sekretarin işini, hem angıları ayırıldılar komissiyaya gelän mandata, yok nicä ayırılsın önderci yada komissiyanın sekretar görevinä».
Moldova devletin Parlamentin deputatı Vasi̇li̇y Tarlev eni dişilimekleri nasaat etmedi.
VASİLİY TARLEV MD Parlament deputatı, “Viitorul Moldovei” partiyanın öndercisi
«Sade bir cümlä-erli varsaydı nicä, alıp esaba peydalanmış durumu, olaceydı sanȇrım, dooru bir tarafa almaa bu kararı, kabledincä Veneţian komisiyanın kararını».
İşlettirärkän kanon iniţiativayı, avtorlar aldılar esaba Merkez Seçim Komissiyasının cümleleri, angıları yapıldılar 2024 — cü yılın hem 2025 — ci yılın Parlament seçimnerindän sora.