Dezgincä küüyundä eni Kultura evini düzerlär. Şindiki zamanda kaldırılȇrlar duvarlar.Proektin giriştirilmesi sevindirer erindeki yaşayannarı. 

Kultura evin yapmasında işlerin ilk payına girer duvarların kaldırması.Bu obiektin finanslanması geler regional büdjettan kapital koymaklardan.Yılın ortasına kadar plannanılȇr kaldırmaa duvarları hem koymaa örtüyü, ondan sora ilerleyeceklär başka işlär.Var umut,ani Gagauziyanın Bakannık komiteti hem GHT tutturaceklar Kultura evin yapılmasını illeri dooru da,angısın var büük önemlisi gagauz kulturasının korumasında, nışanandı primar Vasiliy Kapsamun: «Biz yaptık tender,ayırdık, kim geçirecek işleri, pak bir kişi katıldı Kultura evini yapmaa.Para burayı gidecek 4.5 milliondan biraz taa zeedä – kaldırmaa deyni duvarları hem örtüyü koymaa.Ondan sora taa bir etap var- kapuları,pençerleri koymaa bu binada. Ondan sora da ileri dooru çalışacez,yapmaa deyni kosmetik işlerini içindä,deyni bu proekti bütündän başarmaa».

Küüyün yaşayannarı urgulȇȇrlar,ani Kultura evin yapılması çok önemli cümnenin hem yaşamak punktun kultura yaşamasında.

«İslää,ani düzmää çekettirdilär,makar ki bunun dolayında çok dartışmak vardı».

«Canım acıyȇr, ani bozdular eskisini, çok kaaviydi,ama neysä, genä olsun makar».

«Saa olsun,kim çeketti ,da yapȇr,olacek uşaklara.Bizä şansora Alla biler nekadar kaldı yaşamaa, beki biz da görecez.Sevineriz,ani olȇr».

«İi bakȇrım,ani kultura evini yapȇrlar,zerä yıktıydılar».

«İslää bakȇrız, ama yapsınnar onu, olacek nereyi gençlär gelsinnär, bizim adetleri tutaceklar».

«Bizdä taa olarsa kolylık gelmää,ii olacek.Ama gelmärsäk –uşaklara, unukalara olacek, sevineceklär.Biz sevineriz.Açan geçersin da görersin,ani küüdä bişey yapılȇr, canda taa aydınnık olȇr.Çok gözäl.Şükürlük kuvetlerä».

İnsannar sayȇrlar,ani eni kultura merkezi olacek ii bir er,geçirmää deyni yortulu olayları hem erindeki cümneyi ilerletmää.