GHT sıradakı oturuşunda deputatlar kaavilettilär programayı, amgısına görä Gagauziyada zor durumda bulunan aylelär yısıtmak ayları için destek keblederlär. Taa derindän süjetimiz.
GHT kabledilmiş karara görä, yaşayannarı yılın suuk aylarında desteklemesi programası kaavilendi. Bu uura ödemeklär için finanslar Gagauziya büjetindä var. Soruşu bakarkana deputatlar tekli̇f etti̇lär bu sayıları zeedeletmää da ödemää yaşayannara diil 400-är ley ayda, ama 700-är, çünkü natura gazın paası da ceviz ayından 20 leydän zeedä kuracek.
“Gazın paası 20 leydän zeedä kuracek. Biz zor durumda bulunan yaşayannarımızı problemaylan bir-birä brakȇrız. Büün pek paalı hem kömür, hem odun sanȇrım, ani gaz da taa paalılansın yakışȇr. Teklif edelim Bakannık komitetinä bu yılın kasım hem kıran ayları için bulsunnar lääzımnı sayıda finans hem makar 700-är ley yaşayannara versinnär”.
Bu tekliflän kayıl oldu GHT deputatı Vladimir Kıssa. O nışannadı, ani lääzımnı sayıda finansları var nicä almaa bücetttä serbest kalan finanslar uurundan.
“ Bu sayı var nicä kaldırmaa 700 leyä dä, 800-zä dä, neçinki gaz şansora paalılandı. Bu finansları var neredän bulmaa. 400 ley büünkü gündä heptän az”.
GHT başın yardımcısı Georgiy Leyçu teklif etti ödemekleri zeedeletmäk teklifini karara koymaa hem izin vermää Bakannık komitetinä 2 aftanın süresindä bulmaa lääzımnı sayıda finansları hem bücetä diişilmekleri geliştirmää.
“Bän dä bütündän destekleerim. Teklif ederim sölediklerimizi kararımızın ikinci punktunda yazmaa, Bakannık komitetinä iki aftada bulmaa finans kaynaanı hem diişilmekleri kanona hazırlamaa, ki biz canavar ayın 10-na kadar kabledelim bu soruşu. Zeedeleyelim bu ödeklerin sayısını 700 leyädän”.
Hep ölä oturuşun süresindä deputatların kimisi teklif ettilär gelecektä vereceykana bu ödekleri almaa esaba herbir insanın yada aylenin gelirini. Bu soruşun sebepindän kimi dartışmaklar peydalandılar.
“Benim teklifim-vermemää bu finansları herbirinä sıravardır, ama belli etmää onnarı , kimä onnar en pek lääzım. Çünkü büün kimisä yok neylän sobasını yaksın, kalanı sa kırmızı halver bu paraya satın alȇr”.
“Bana kalsa HT lääzım izin versin Bakannık komitetina bu soruşun yol kartasını düzsün. Burada esaba lääzım alınsınnar hem insannarın sayısı, angıları zor durumda bulunȇrlar hem evlerin sayısı. Var nicä olsun ölä, ani bir evdä bir pensioner yaşȇȇr, hem öbür evdä birkaç”.
“Bän kayılım kafadarlarımınnan hem teklifimi Bakannık komitetinä açıklamaa isteerim. Dooru, ani kimilerin pensiyaları 20-25 bin ley kurȇr, kimilerin sä 2000. Burada dooruluu lääzım belli edelim”.
Bakılan soruşa diişilmekleri geliştirmää deyni kendi seslerini verdilär GHT 18 deputatı. Hep ölä teklif edildi, ani bu ödemeklär vakıdında gerçeklensinnär.