Mart ayın 17-dä HT maasuz oturuşu geçirildi, onun süresindä Halk Topluşu seçimneri geçirilmesi günü belli edildi. Deputatlar kararladılar kanon organına seçimneri kirez ayın 21-dä geçirmää. Bu soruştan kaarä, deputatlar seçim organına Halk topluşundan hem Bakannık komitetindän verilän kandidaturaları kablettilär.
Halk topluşu oturuşun süresindä kanon kurucu organından 3 kandidat Gagauziya Merkez seçim komissiyasına (adlanan nicä Merkez Seçim nasaatı Moldova Seçim kodeksindä) teklif edildi. Onnarın arasında Pötr Zahariya, Sergey Stoyanoglo hem Natalya Konstandoglo. Bakannık komitetindän teklif edilän kandidaturalarlan barabar onnar izmet eminini gerçekledilär. Daava uurundan kandidatlar, ölä da verilmedilär HT, ama bu engel etmeyecek MSK ( adlanan nicä Merkez seçim nasaatı) kendi işini gerçeklemää başlamaa, nışannadı GHT başın yardımcısı Georgiy Leyçu: «Kanona görä Merkez seçim komissiyası var nicä işlesin, kararların var üridik hakı, eer onnar için kendi seslerini seçim organın 5 azası verärseydilär. Bizdä 6 kişi var. Biz umutlanȇrız, ani büünkü oturuştan sora daava kurumu seçecek kararı hem bizä onnarın kandidaturalarını belli edeceklär. Biz sevinecez MSK daava uurundan kandidatlarlan doldurmaa. Çizgileerim, ani onnarın yoksuzluu engel etmeer seçimneri geçirmää».
GHT deputatı Vladimir Kıssa nışannadı, ani seçim organın azaları işä girişsinnär yakışȇrlar.
«Bän herzaman dialog için söz götürärdim. Bän isteerim, ki MSK yada MSN 9 azasınınnan işlesin. Lääzım daava uuru da olsun, HT da olsun hem Bakannık komiteti da olsun. Büünkü gündä var 6 kişi, angıları emin ettilär. Onnar öndercilerini, sekretari hem yardımcılarını var nicä seçsinnär. MSK var nicä başlasın işlemää»,- Vladimir Kıssa nışannadı.
Deputatlar seçim gününü teklif edärkenä 2 data belli ettilär, kirez ayın 21-ri hem ceviz ayın 20-si. Deputatların taa çoyu kirez ayın 21-ri için kendi seslerini verdilär.
«Bän pek isteerim, ani bu data son olsun hem biz kanona görä seçimneri geçirelim. Büün biz kaavilettik MSK hem belli ettik seçimneri geçirmäk gününü kanona görä. Ötää dooru ne olacek bän bilmeerim. Ama bän pek isteerim, ani biz bu politika krizisindän adımnayalım, nicä bunu demokratik devletlerindä yapȇrlar»,- Nikolay Ormanji nışannadı.
Oturuşun süresindä kanon kurucuları baktılar hem kablettilär başka önemni cümnä-ekonomika soruşlarını da.