Moldova Parlament deputatları KDU iş vizitlan geldilär. Studentlärlän buluştular Moldova parlament deputaları Marçela Adam hem Anna Kaliniç.
İlkin deputatlar buluşturlar universitetin rektorunnan, da baktılar soruşları, angıları baalıydılar regionda üüretim proţesinnän, studentlerin tutturmasınnan hem universitetin katılmasınnan dünnäarası üüretim programalara. Ayırı bir er verildi barabar çalışmak için perspektivalara, alarak esaba Evropa integraţiyasını hem kolaylıkları çekmää proektları hem grantları.
«Universitet geçer akreditaţiyayi milli hem dünnäarası uurunda may hepsi zanaatlarda. Biz geçtik devlet akreditaţiyasını. Bizim başarannarımız iş kendilerinä bulȇrlar. Bizim daavamız diil sade üüretmää, ama işä koymaa da»,- urguladı rektor.
Studentlärlän dialogun süresindä deputatlar annattılar devletin kanon organın strukturası hem işi için, mehanizmalar için kanon kabletmesindä hem parlament komisiyaların çalışması için nicä onnar hükümetlän barabar işleerlär. Marçela Adam parlament deputatı haberledi, ani ayırı bir er verildi kanon proţeslerin açıklıı için hem gençlerin rolü için devlet politikanın kurulmasında.
Marçela Adam MD Parlament deputatı söledi: «BizbüüngeldiklafedelimstudentlärlänMoldovaparlamentiiçin neçinki bu yıl 35-ci yıldönümü nicä o kuruldu. Hem lafetmää nicä bu vakıdın süresindä parlament işläärdi hem nesoy ilerlemäk strategiyası Moldovaiçin var hem da evrointegraţiya için lafedecez neçinki bu bizim devletimiz için strategiya akıntısı da bu vizitin teması».
Buluşmanın ayırı temasınnan oldu Moldovanın evrointegraţiya kursu. Deputat Anna Kaliniç urguladı, ani Evropa birliinä yaklaşmak açȇr eni kolaylıkları ekonomika, üüretim hem soţial sferasının ilerlemesi için. Onun laflarına görä integraţiya proţeslerinnän bakılȇr Evropa standartların giriştirmesi türlü uurlarda hem programaların genişletmesi studentlerin hem genç uzmannarın tutturmasında.
Anna Kaliniç MD Parlament deputatı çizgiledi: «Bizä önemni studentlärlän lafetmää. Biz okullara da gideriz neçinki evrointegraţiya- o şindiki hem gelecää için hem da türlü kolaylıklar için gençlerä. Onnar bunun için lääzım bilsinnär, açılȇr çok kolaylık da onnarı lääzım yaşamaa hem kullanmaa. Elbetki biz haberleeriz nicä proţes gider, ama taa yakışıklı dildä, neçinki herbir kişi Moldovada geçer bu proţestän, da duyacek onun çıkışlarını. Onnar lääzım bilsinnär ne olȇr, nesoy devlettä neetlär hem annasınnar ne o evrointegraţiya, hem Evropa, Evropa birliin strukturası neçinki onnar Evropa birliin azaları».
Studentlär aktiv soruşları koyardılar meraklanıp iş bulmak perspektivalarlan, üüretim programalarınnan sınır aşırıda hem gençlerin katılmasınnan devletin cümnä- politika yaşamasına. Buluşmak geçti açık dialogun formatında da verdi kolaylık gelän uzmannara kabletmää haberleri ilk eldän.
« Bizä nicä gençlerä önemni diil, ani bizimnän parlamentariyalar buluşȇrlar, ama o ne lääzımnı üürenmektä ki taa çok bilmää. Çok biz var nasıl kendi üüredicilerimizdän annayalım, ama açan buluşȇrız var nasıl dialoga katılalım parlament temsilcilerinnän da bu taa islää. Onnar var nasıl annatsınnar ne halizdän olȇr. Pek önemni bilmää nicä hem nesoy iş gider, hem ne taa lääzım Moldova yapsın, ki evrointegraţiya proţesi başarılı geçsin».
« Bän sayȇrım, ani bölä buluşmaklar lääzımnı, açan evrointegraţiya proţesi bakılȇr hem da o en önemni tema, angısı parlamenttä bakılȇr. Bu yardım eder bizä gençlerä taa islää annamaa parlament işini, hem nicä bölä soruşlar bakılȇrlar. Dialog lääzım olsun yaşayannarlan da olmasın deyni çok yalan hem feyk haberlär».
Kurucular nışannȇȇrlar, ani bölä buluşmaklar yardım ederlär kaaviletmää baalantıları parlament hem gençlerin aralarında, hem kurȇrlar aktiv vatandaşlık bakışını studentlerdä.