“ZAMANIN KOPMAZ İPİ: ASİRLERİN BAALANTISI HEM KOPMAZ İPİ” bilim-praktik konferenţiyası Kirsovo küüyündä geçirildi. Bu olayı D.Kara Çoban adına Milli gagauz istoriya hem etnografiya muzeyin 60-cı yıldönümünä adadılar. Taa derindän süjetimiz.
Yortulu olayda pay aldılar Moldovanın, Gagauziyanın hem türk dünnesi devletlerinin muzeylär öndercileri, izmetçileri, bilim adamnarı. Ceviz ayın 16-da, 60 yıl geeri Beşalma küüyündä yazıcı D.Kara Çoban muzeyi açmış. Büün “Muzey o bir köprü: geçmişin hem gelecään arasında” nışannadı Gagauziya Kultura bakanı Marina Semönova.
MARİNA SEMÖNOVA Gagauziya Kultura bakanı
“Muzeyin istoriyası o 60 yıl kulturayı hem istoriyayı korumak. Çalışmak yolunda D.Kara Çoban adına Milli gagauz istoriya hem etnografiya muzeyi en önemni daavasını tamannȇȇr-toplȇȇr, koruyȇr, ilerleder gagauz halkının istoriyasını hem kultura zenginniini. Muzey- o bir köprü geçmiştän gelecää”.
D.Kara Çoban adına Milli gagauz istoriya hem etnografiya muzeyi tek muzey bütün dünnedä, neredä toplu gagauz halkının yaşamasından unikal eksponatlar. Büün onnarın sayısı 22 000 yaklaşȇr. Destek için muzey işindä şükürlük laflarınnan musaafirlerä muzeyin öndercisi Lüdmila Kara Çoban-Marin danıştı.
LÜDMİLA KARA ÇOBAN-MARİN D.Kara Çoban adına Milli Gagauz istoriya hem etnografiya muzeyin başı
“Büün muzeyin işi bir tarafta kalȇr, kaldı. Ama büünkü önderciliin yardımınnan hem destäännän bizim işimiz ilerleer. Bu destek bizä deyni pek önemni. Biz şükür ederiz Türksoy kurumunu yardım için. Bizim muzeyimiz Türksoy muzeyleri reestrusuna girer. Biz şükür ederiz herbirini, kim bizimnän büün barabar”.
Önemni urgulamaa, ani olayın gerçeklenmesinä yardımcı oldu TÜRKSOY kurumu. Gagauziya gözledici olarak bu kuruma 1999-cu yılda girdi. Büünkü gündä D.Kara Çoban adına Milli gagauz istoriya hem etnografiya muzeyi Türksoy reestrusuna girän muzeylerlän baalantıları ilerleder. Yortulu olaya bu muzeylerin öndercileri dä katıldılar.
MUHARREM HAYIR Türkiye Devleti Türk hem İslam incäzanaat muzeyin öndercisi
“En ilkin Sayın kultura bakanımızı Merina Hanımı şükür ederim, genel sekretarliimizi şükür ederim . Kardaşlarımnan burada bulunmak çok gururluyum . Benim için çok özel bir gün”.
BAKHTİYOR KHODJAEV Uzbekistan Devlet İstoriya Muzeyin “Taşkent muzeyi” filialın başı
“En ilkin isterim danışmaa şükürlük laflarınnan MD Gagauz bölgesinä bu onemni istoriya olayına katılmak teklifi için, istoriya hem muzey izmeti uurunda olaya katılmam için. Şükür ederim kultura bakanını Semönova Marinayı ”.
AMİNA MELİKOVA Azerbaycan Milli Kilim Muzeyin başı
“Bana deyni büük sevinmelik hem saygı bulunmaa büün bu topraklarda hem bu konferenţiyada pay almaa”.
D.Kara Çoban adına Milli gagauz istoriya hem etnografiya muzeyi sıkı baalantıları tutȇr Moldovanın muzeylerininnän dä. Yortuya katılan MD ȇtnografiya hem natura milli muzeyin öndercisi Petru Vikol nışannadı, ani Beşalma muzeyin diil sade regional, ama devlet uuru maanası hem önemi var.
PETRU VİKOL MD Milli etnografiya hem istoriya muzeyin Genel başı
“İsteerim açıklamaa sizä bizim uzmannarımızın kutlamaklarını. İsteerim açıklamaa selemneri MD Kultura ministrusundan Soroçanu Dandan, angısınınnan bän dün lafettim. O yalvardı kutlamaklarını hem saalık dileklerini sizlerä etiştireyim. Hem o adadı, ani gelecek Gagauziyaya açıklamaa deyni problemaları kultura uurunda , neçin deyni bizim devletimizdä var çok kulturalar, angılarını birleştirer bir Devlet”.
Olayın süresindä konferenţiyanın payalannarına hem musaafirlerinä deyni D.Kara Çobanın zengin hem unikal resim hem skulptura sergisi gösterildi.