Kubus Nikolay için haliz çorbacı – o adam, angısı becerer işlemää, kendi evini tutmaa hem iştän korkmamaa. Valkaneştän çıkma Nikolay 30 yıldan zeedä eşinnän birliktä Çeşmä küüyündä erleşmişlär. Burada karı-koca kendi çorbacılıını kurmuşlar- burada onnar meyva, zarzavat büüderlär. Kuş, hayvan tutȇrlar.
Açan Nikolay Kubus Çeşmä küüyündä ev aldı, ilk ne düşünmüş – suyu evä getirmää. Pınar kazmış hem çorbacılıını düzmää başlamış, büün onun aulunda meyva fidannarı, üzüm, zarzavatlar hem emişlär büüyerlär. Baseyndä Nikolay kendisinä deyni balık büüder.
NİKOLAY KUBUS Çeşmä küüyün yaşayanı
«Haliz gagauz – ii çorbacı».
Nikolay söleer, ani susuz ii çorbacılık olamaz. Bunun için pınar ilk adım oldu o yaşamaya, angısına o küçüklüündän alıştı.
NİKOLAY KUBUS Çeşmä küüyün yaşayanı
«Evdä su varkana, var kolay eşillik büütmää».
Çalışmaa Nikolay Kubusu ana-bobası uşaklıından üüretti. Küçüklüündän o ev işlerindä yardım edärdi, imää yapardı, aulu işläärdi. Büün var olan becermeklär, yaşamak derslerin önemlisi, angısını Nikolay aylesindän çekti.
NİKOLAY KUBUS Çeşmä küüyün yaşayanı
«Ana – bobam işlemää üürettilär».
Kahramanımızın anmaklarında özel eri bobası kaplȇȇr. Koli batü annadȇr, ani anası hem bobası çok işlärdilär, ama herkerä uşaklarını terbiedärdilär, üüredärdilär büükleri saysınnar hem ev çorbacılıında yardım etsinnär.
NİKOLAY KUBUS Çeşmä küüyün yaşayanı
«Yaşamamda bir kerä bilä ne anamı, ne dä bobamı utandırmadım».
Koli batüyä hem Lena bulüya deyni evdä yaşamak için kuş-hayvan bakmak hem aulu işlemäk yaşamak sorumnuu hem ii bir tutturmak pensiyada. Büüdülän zarzavatlar, bakılan kuşlar hem hayvannar er artarsalar, kalanı mallar satılaa giderlär, ki olsun neyä yaşamaa.
NİKOLAY KUBUS Çeşmä küüyün yaşayanı
«Aulda patlacan, biber, laana var, ama satȇrız da, olsun neylän suyu, gazı ödemää».
Kubus Nikolay için ev çorbacılıını götürmäk – yaşamak sırası, angısını o kendi aylesindä gördü hem büünnnän-büün ilerleder. Onun çorbacılıı – o hergünkü çalışmak hem filosofiya: olsun kendindä hem paylaşarsın yoksullan.