Kotovskoe sokaa Çok-Maydan küüyündä — regional yolu sayılȇr. Büünkü günä, yolun bir payı asfaltlı, ikinci bölümü kötü halda bulunȇr, çizgileerlär küü kuvetleri. Durum transpordu kullanan şoförları hem yaşayannarı zorladȇr.
Problemaların birisi, angısınnan Çok-Maydanın yaşayannarı karşılaşȇrlar – aulların yol sellerindän buultması. Sokaan yaşayanı Mariya aalaşȇȇr, ani yol üüsekliktä bulunȇr da yaamurlu havada sular aullar içinä akȇrlar. Bundan kaarä, tek eski örümäk yolu bataklan dolȇr, bundan insan yolda örüyer.
«Uşaklar yol üstündä giderlär, zerä burada batak olȇr, yok nicä gitmää. Uşaklar şkolaya, uşak başçasına, analar – bobalar bu sokaktan giderlär»,- Mariya aalaşȇȇr.
Çok-Maydanın başı Oleg Konstandoglo söleer, ani Kotovskoe sokaa küüyün Büük sokaa, angısı primariyaya, okula, uşak başçasına götürer. Küülülerin danışmalarına görä, yolun ikinci payı hem örüyennerä deyni yol düşer yapılsın. Küü kuvetleri alındılar var olan problemayı çözmää da taradılı granta neetlenerlär asfalttan yolu yapmaa, trotuarı, bordürları koymaa hem su akıntılarına erleri yapmaa. Asfaltı yolun uzunnuu — 1,5 кm. Kalan 850 m ilkyazın neetlenerlär çeketmää yapmaa.
«Programanın çerçevesindä yol yapılacek, bordürlar koyulaceklar, trotuar yapılacek»,- Oleg Konstandoglo söleer.
Primarın laflarına görä, küüdä trotuar yok, bundan yaamurlu havada insan yol üstündä gider.
«Eski trotuar Sovet vakıdından kalma, yaamur yaadıynan, yolcaaz mılitura içindä kalȇr»,- Oleg Konstandoglo söleer.
Eni trotuarın uzunnuu bir kilometradan zeedä olacek hem 1,5 metra genişliindä. Proekt „Europa este aproape”programasına görä çalıştırılȇr. Erindeki kuvetlerin kontribuţiyası 10% kurȇr. Proektin toplam paayı 9 mln. 300 bin ley kurȇr. Yol işleri ilkyazın başlayaceklar, başarmaa onnarı neetlenerlär yarım yılın içindä.