Çok- Maydan küüyündä çekettilär işlär kultura evin düzülmesindä – bu küüyün soţial obyektlerin en önemnisi. Proekt yapılȇr «Evropa küü- 2» programasının sınırlarına görä da doorulu kultura yayınlanmasının modernizaţiyasına, yaşayannar için uygun koşulların kurulmasına.
«Evropa küü »programasının sınırlarına görä, angısı doorudulu yaşayan punktlarında infrastrukturanın ilerlemesinä hem küü yaşayannarın yaşamak uurun taa ii yapmasına yapıldı proekt örtü diiştirmesindä Çok- Maydan küüyün kultura evin yapısında. Primarın laflarına görä örtünün enilenmesi baş hem önemni etap yapının modernizaţiyasında. O çok vakıt akardı da vardı risklär içindeki odaların, kabinetlerin, sţenanın bozulmasına. Eni konstrukţiya koruyacek yapıyı yaamurlardan, kaardan, üüseldecek onun energiya arttırmak uurunu hem uzadacek izmet etmäk vakıdını nışannadı primar Oleg Konstandoglo. Ondan sora nicä örtüyü diiştirdilär çeketti eni etap- içindeki odaların düzülmesi hem sıcaan arttırmasınnan baalı proekt. Kultura evinä, angısı çoktan yapıldı kapital remont lääzım. Fasadın ipranması, injener komunikaţiyaların aşındırması, diil efektiv yısıtmak sisteması hem koşulların yoksuzluu olayların geçirmesi için – oldular baş sebeplerinnän rekonstrukţiya çeketmesi için.
«Şindi ikinci etap gider- tertitoriya tertiplemesi. Biz basamakları kultura evin önündä enilettik, kultura evin dolayında brusçatka konulȇr, trotuarlar yapılȇr, skemnelär konulȇr. İleriya dooru fidannarı dikecez. Zalda tavannarı yaptık. Burada olayları geçireriz, makar ki da remont lääzım yapılsın»,- nışannadı primar Oleg Konstandoglo.
Kultura evi önemni rolü oynȇȇr küüyün cümnä yaşamasında, bunun için onun eniletmesi pek önemni küü için, söledi Kultura evin başı Lüdmila Vakarçuk: «Umutlanȇrız, ani primariya bulacek başka paraları da proektlarlan işleyecez. İşlär zalda olaceklar, neçinki bu pek lääzımnı. Bizdä var kolektivlär, angılarını isteeriz bütün gözelliktä göstermää. Biz yortuları yazın dışarda geçirdik. Bitki Kasım hem Şarap yortusuydu. Taa biz eni yılı zalda geçirecez, zerä suuk, zor bölä işlemää hem insannara gözellii göstermää»
Lüdmila Vakarçuk nışannadı, ani kurumda çoktan lääzımdı kapital remont hem modernizaţiya yapılsın.
«Bukadar yıllarda hepsi aşındı, duvarlar, kireç trofalandı da yapıyı lääzım kaaviletmää, neçinki arhitektura tarafından o pek gözäl. Küüdä yok çok yapı. Kapular, pençerelär, sţenada şafk, kreslaların diişmesi. Hayatta bizä remont lääzım, neçinki olayların yarısı orada geçer. Biz payettik küçük hem büük zallara»,- Lüdmila Vakarçuk nışannadı.
Proektin bütünnä paası 5 milion ley kurȇr, angılarından 800 bin Çok- Maydan bücetin kontribuţiyası, nışannadı primar. Da «Evropadakı küü-2» programaya görä verilän paralar etişmeyeceklär kultura evin düzülmesi için bütündän. Bunun için erindeki kuvetlär aarȇȇrlar finanslamak sızıntıları, angıların yardımınnan işlär biteceklär.
«Kendi kuvedimizlän yapamayacez. Smeta dokumentleri hazırladık, orada iki milliona iş bakılı, bunun için partnörları aarȇrız. Şindi verdik dokumentleri grant programasına. Bekleeriz çıkışları, onnar 2026-ci yılda belli olaceklar. Hepsi olarsaydı çekedecez işlemää»,- nışannadı primar Oleg Konstandoglo.
Nicä nışannadı primar Oleg Konstandoglo işleri koyulu plana belli edilän vakıtta bitirmää. Ama sıradakı etaplan olacek energiya arttırmasında proektin yapılması, angısı verecek kolaylık iisiltmää harçları yapının izmet etmesindä.
«Neetleneriz fasadı kaaviletmää. Yapının arhitekturası kalacek, bütündän yapıyı sarmayacez. Brakacez ölä nicä var. Elbetki diişterecez kapuları, pençerleri. Sora da içindä işleri yapacez»,- nışannadı primar Oleg Konstandoglo.
Erindeki kuvetlerin laflarına görä kultura evi restavraţiyadan sora olacek zamandaş çok funkţional merkezinnän, angısı verecek kolaylık geçirmää konţertları, sergileri, üüretim hem soţial olayları eni uurda.