Gagauziya merkezindä avtonomiyanın çiftçileri için seminar geçirildi, neredä onnarı tanıştırdılar eni gübrelärlän, angıları er hem büümnär için kullanılȇr. Seminarı Gagauziya çiftçi bakanı geçirdi. Buluşmakta payalannar kablettilär faydalı bilgileri malların büüdülmesi için hem kalitesi için. Seminarda GRT kanalın çekim grupası da bulundu.
Avtonomiyanın çiftçilerini eniliklärlän agrar sektorunda MD bir kompaniyası barabar Türkiya devletindän temsilcilerinnän tanıştırdı. Açıklayarak gübrä temasını, seminarın temsilcilerinä annattılar malın faydası için türlü büümnerä hem topraa.
Janna Toporaş kompaniyanın temsilcisi: «Önemni neyet — bir pilot proekti. Biz teklif ederiz fermerlara, agronomlara hem Gagauziyanın çiftçi çorbacılıklarına praktikada bu malı denemää. Elbetki, onun için çok informaţiya verilecek, ama taa önemli-kendileri denesinär. Biz umutlanȇrız ki agrariyalar bunda yardımcı olacek hem çıkışları kabledelim».
Derindän eni mal için agrar sektorunda çiftçileri gübränin işlettiricilerin birisi tanıştırdı, Türkiya delegaţiyanın temsilcisi, bilimci Ömer Şen: «Bu takım gübrä kullanılması 1972 yıldan sora başlanıldı kullanmaa, ama diil satmak için. Zoordu annamaa angı meyvaya hem zarzavata ya topraa hem büümeyä ne lääzım, organik ilacı yapıldı ölä, ani hepsinä yakışıklı olsun. Hem büümnerä yardım etsin, hem insanın saalına da iilik getirsin. 2009 yıldan sora yavaş-yavaş bu mal başlanıldı satılmaa, şindi dä ii kullanılȇr da ii başarları gösterer. Bütünnä dünnedä 90 zeedä mineral var, insanın güüdesindä yakın 37 mineral. Kimi bilimcilär sayȇrlar, ani bor malın kullanılması var nasıl kimi problemalar büümnerä getirsin, o üzerä maasuz ȇnzimnar kullanılȇr».
Gagauziya çiftçi bakanı Sergey İbrişim urguladı agrar sektorunda türlü eniliklerin giriştirilmesi faydalı hem lääzımnı.
«Ekonomika agentleri istedilär maasuz çiftçilärlän göz gözä buluşsunar, onnarın problemalarını annasınar, tabiyatın diyşilmesi için. Bizä deyni bu pek önemli, neçin ki insan biri birinnän buluşȇr, o üzerä malın paası taa paalı olmȇr»,- Sergey İbrişim urguladı.
Kompaniyanın temsilcileri annadȇrlar, ki bor malı topraa kuvedini çevirer, onu prost işlerdän paklȇr. Taa bıldırdan inovaţiya malını avtonomiyanın bir çiftçisi, Leonid Kösä denedi. Kendi düşünmeklerinnän kollegalarlan paylaştı.
«Biz denedik bu ilacı 2 gektar toprakta- 5 litra ektara, sora taa bir sıra. Bıldırkı yıl zoordu, kuraklıktı, onuştan büük çıkışları beklämärdim. Ama bakarak başka kırlara hem büümnerä, bu erdä 200-250 kilaya semeçka taa çok çıktı. Bu iş beni meraklandırdı, da bän teklif ettim gelsinär da teklif etsinär çiftçilerä bu malı denesinär»,- Leonid Kösä urguladı.
İnsana deyni ekologiya uurunda pak imelik malı lääzım, sayȇr GHT deputatı Demyan Karaseni. O urguladı, ki eni tehnologiyalar agrar sektorunda hem fermerların tutturması önemni bir iş avtonomiyanın hepsi yaşayannarı için.
«Biz agrar regionu, ilk erdä çiftçi kurumnarı durȇr, angıları büdjeda para getirer. Onuştan sayȇrım önemni pilot proektini giriştirmää, praktikada görmää nesoy büümnerä fayda getirer. Proekt Gagauziyadan başlȇȇr, umutlanȇrım ileri dä genişlenecek»,- Demyan Karaseni urguladı.
Seminarın bitkisindä agraruyalara teklif edildi pilot proektindä pay alsınar, nedän sora çıkışlara bakarak ayırsınar angı tehnologiyalarlan kullanmaa ileri dooru.