Moldovada  bütündän gider üzüm bereketin toplaması. Agrariyalar  bütün devlettän  çıktılar  kırlara, ki hava verärkän  kolaylıkları toplamaa bereketi kayıpsız hem yaamurlaradan. Bakmadaan  bu yıl hava koşullarına, regionun agrariyaları nışannȇȇrlar, ani  bereket taa ii, nekadar geçän yıl. 

Çin sabaylendän kırlarda gider sıkı iş, insannar ellän toplȇrlar  üzüm bereketini, nicä masa çeşitindä, ölä da şaraba deyni.  Gagauziyada 5 bin ektardan zeedä üzüm plantaţiyası var. Bu yıl hava koşulları belli ettilär kendilerini baalarlarda da. 

«Aaraştırarak  göreriz ani bitki yıllar koşullar diil ii, etişmeer nemnik,  bu yıl biraz taa ii bereketin kalitesinä görä, biraz taa üüsek sayısı, ama hep okadar taa  taa ii nekadar geçän yıl hem ötä yılkı. O biraz bizi sevindirdi, bakarak geçän yıllara»,- dedi agronom.

Semön Novaan kurumunda  büüderlär 13 çeşit  üzüm 230 ektarda. Toplanılmış kırdan bereketi  götürerlär erli şarap  kurumuna.

«Taa çok şarap uurunda üzümnär, Moldovadan kaarä.  Var  risling, muskat otonnel, sovinyon, kaberne, merlo, başka çeşitlär, floriçikayı diktik, maasuz moldova çeşiti. Yoktu bizdä taa ileri o»,-  nışannadı çiftçi. 

Gagauziya anıldı kendi  şarap adetlerinnän. Bereketin taa çok payı gider şarabın yapmasına, nicä erli panayırına, ölä da masa çeşitlerini eksporta yollȇȇrlar.

«Eer bakarsak  hepsi işlerä angılarını biz yapȇrız kırda, baalarda, nekadar insan burada çalışȇr,  ozaman paa lääzım olsun  diil az 8-9 ley. Neçinki   olarsa taa az, biz kayiplara işleyecez»,- söleer agronom.

Üzümün bereketin toplaması taa bir iki afta sürtecek. Oktäbr  ayında da çekedeceklär şarapları yapmaa. Nicä nışannȇȇr agronom  yıl yıldan işçilerin sayısı  azalȇr, taa çok büük yaşta insannar  işleer, gençlär istämeerlär  gelmää kıra.

«25-30 proţent  kaldı bakarak  geçän yıla,  hepsindä bölä problema. Gençlär hiç yok. Onnarın yok havezleri işlemää kırda».

İşçilerin taa çoyu  pensiyada. Onnarın  laflarına görä  işlemää kırda diil kolay , ama küçük pensiyaylan yaşayamȇȇrlar. En büük yaşta insan 75 yaşında.  Kırcıların  laflarına görä  bu yıl bereket ii. 

«Çok yıl işleerim, kolay, sınaştık. Gençlär istämeerlär gelmää».

«Gençleri başka erä çekerlär, orada taa zeedä öderlär».

«Pek zor kırda işlemää, en zor burada iş. Güneş yakȇr, toprak tabannarını yakȇr. Gelersin evä karaysın. Zor».

«2004  yıldan işleeriz, birerdä çalışȇrız, kazanç parası ii, kaldırdılar biraz onu. Bereket bu yıl ii».

Bu yıl Moldovada plannadılar toplamaa 600 bin ton üzüm bereketi  söleerlär ȇkspertlär, onnardan 150 bini masa çeşitindä, 100 bin  satılacek aşırıya.