Çadırda enilenecek kasaba infrastrukturası, soţial kurumnarın ênergiya korumak uuru enilenecek hem başka işlär yapılaceklar — hepsi bunnar olaceklar revitalizaţiya programanın üçüncü êtapın geliştirilmesindän sora. Işlär başladılar bu yaz.
Soţial Kurumnarın birisi , angısı revitalizaţiya programasına girdi oldu 4-cü uşak başçası. Burada programaya görä bakılı örtünün diiştirilmesi hem taa sıcak yapılması. Bundan kaarä üürenmäk kurumunda koyulaceklar güneş panelleri 30 kilovatlık. Bu verecek kolaylık kullanmaa natura ênergiyasını hem azaltmaa harçları şafk ödemesindä, dedi dördüncü uşak başçası başı Elena Konstantinova.
ELENA KONSTANTİNOVA 4-cü uşak başçası başı
«Bu proekt gerçektän pek önemni bizim üüretmäk kurumu için — örtünün diişilmesi hem onun sarılması, güneş panellerin koyulması yardım edecek harcamamaa ama arttırmaa paraları. Şindiki vakıtta maasuz vataylan örtüyü yapêrlar,ki sıcak kaybelmesin. Hep bu proekttä bakılı mini Futbol meydanı. Bizim üüredicilär geçtilär kursları Kişinövda «Zimbru» stadionunda da kendileri sport zanaatını geçirerlär — bu da pek önemni uşakların saalıı için».
Revitalizaţiya programanın sınırlarında bakılı sport uuru da. Şindiki vakıtta geçirlenerlär işlär Kioroglo adına sport okulunda. Burada örtünün bir payını yapêrlar hem koyuldular artık güneş panelleri, nışannadı Çadır kasabanın primarı Anatoliy Topal. Onun laflarına görä kasabada taa başka diişilmeklär da olaceklar .
ANATOLİY TOPAL Çadır kasaba primarı
Gag. «Proekt iki yıla 2026-ci hem 2027-ci. Öbür yıla biz yaza kadar o işleri lääzım bitirelim bütün Mäsokombinatta biz şindiyadan yaptık çok iş, neredä büük katlı evlär. İsteeriz bitirmää o proekti. Büük sokakta Karla Marksa olacek eni asfalt, diişeceklär bordürlar, olaceklar eni trotuarlar, olacek velo yollar, video, uşaklar için oyun erleri. Sport okulda eni kotelniy olacek hem remont başka odalarda hem park Molodöji genişledecez taa, orada olacek mini futbol için, basketbol, olaceklar trotuarlar biçikletaylan gezmää yada örümää insana. Proekt 25 milion leyin üstünä, geler Kişinövdan 22,5 milion, bizim kontribuţiyamızı koyȇrız, Regional Agentlii yaptı tender da biz barabar götüreriz proekti ileri».
Proektä yardımcı olêr Moldova Respublikanın Infrastruktura hem regional erindeki ilerlemäk ministerlii barabar Çadır primariyasınnan. Hepsi işlerin yapılmasını Gagauziya Regional Agentlii kontrol eder.
Anna Karapirä Leonid Arfonos Grt haberlär