Türkiyedän BRTV telekanalının temsilcileri Gagauziyaya iş vizitinnän geldilär. Tanışmak için bu vizit sırasında musaafirlär avtonomiyanın birkaç küüyündän geçtilär, GRT cümnä kompaniyasına uradılar hem «Gagauziya Gün- Gündän» programasında pay aldılar. Nicä geçti buluşmak bizim süjetımızda üürenecez .Tanışmak için Gagauziyaya BRTV televizion kanalının temsilcileri hem onun başı Mehmet Çetinkaya iş vizitinnän geldilär. Bulunarak avtonomiyada onnar birkaç küüyä hem kasabaya uuradılar, ki Gagauziyanın kulturasını, adetlerini üürenmää hem tanışmaa GRT cümnä kompaniyasınnan da. BRTV telekanalı 1996 yılda kuruldu, büün o Türkiyedä yayın yapan telekanalıdır. GRT da musaafirlär televizion hem radionun işinnän tanıştılar, hem «Gagauziya Gün- Gündän» programasında pay aldılar.
« Bän çok devletä vardı gittim, neçinki bu uurda işleerim. Amma Gagauziya beni çoktan meraklandırdı. Duydum kendimi burada nicä evdä»,- Mehmet Çetinkaya nışannadı.
Türkiye televizion kanalın temsilcilerinnän geldi Zonguldak sanayırcı iş insannarı başkanı Nejdet Tiskaoolu. O açıkladı, ki ayırı onu dürttü yaşayannarın sıcak kaarşılaması hem kolaylık ana dilindä lafetmää.
«Burayı gelip , büük sevinmelik hem hodulluk duydum. Biz gagauzlarlan kardaşız. Onnar da hep gagauzça lafederlär»,- Nejdet Tiskaoolu söledi.
Musaafirlerin laflarına görä , bu vizit yardım etti onnara taa ii Gagauziyayı üürenmää , onun insannarını hem adetlerini. Mehmet Çetinkaya nışannadı, ki Türkiye devletindän merak çok yılın süresindä var.
Mehmet Çetinkaya BRTV Yönetim Kuruluşu Başkanı söledi:«Biz o vakıtta yaşȇȇrız, açan Türkiye devleti hem Gagauziya iş baalantılarını ilerledeceklär. Bizim devletin başları da , yaşayannar da çok sayȇrlar Gagauziyadan insannarı ».
Nejdet Tiskaoolu söledi, ki ilerdän o az Gagauziya için işittiydi. Şindi o alatlȇȇr vatandaşlarına gagauzlar için annatmaa.
«Söliim halizdän, biz savaşacez bizim devlettä da gagauzlar iöin taa çok annatmaa. Bunun için işleyecez»,- Nejdet Tiskaoolu söledi.
Buluşmanın sonunda musaafirlär çok şükür ederlär GRT cümnä kompaniyasına hem Gagauziyanın yaşayannarına onnarın musaafircilik için.
«Yollȇȇrım büük selämneri, sevda hem saygı duyguları, hepsi arkadaşlara kim Gagauziyada yaşȇr. Ko bu baalantılar hiç kopmasınnar»,- Nejdet Tiskaoolu söledi.
İş viziti braktı BRTV telekanalının temsilcilerinä sıcak duyguları , angıları, onnarın laflarına görä, kuruldular Gagauziyanın musaafirli yaşayannarından, benzeyän dildän hem gözäl adetlerdän.
Avtor: A. Çebanova, operator: G. Stavilov, montaj: M. Kazaku