Devletin üülen tarafında çekettilär bereketin ilk gruppasını toplamaa. İlk kombaynörlar çekettilär toplamaa güzlük arpayı, rapsı hem gorohu, boodayı. Hederlez hem Kirez ayın nemniin erinä geldi sıcak havalar.
Kendi ilk çıkışlarını bereketin toplaması için yaptş Komrat kasabanın çiftçi çorbacılıın başı Semän Novak, angısı uruladı ani bu yıl başladılar bereketi kırdan taa erken toplamaa. Nesoy sayılarlan gider bu proţes annattı kurumun başı.
Semön Novak çiftçi kurumun başı Komrat: «Bu yıl biz taa geç başladık toplamaa, beş günü nekadar geçän yıl, zerä bitki dört kuraklık gider, da büümnär taa erken olȇrlar. Lafımı götürerim ekin için. Ne baalı kalitäylän ona taa etişmedik. Şindi toplȇrız toka geçireriz. Bişey kırılırsa, düzeriz».
Tvardıţa yaşamak erin Pavel Paskalovun çorbacılıında da bereketin toplaması gider sıkı vakıtta, çünkü toplanılmış nemnik bitki aylar, ii belli etti kendisini büümnerdä, ki gelmiş sıcaklar bu durumu bozmasınnar.
Pavel Paskalov çiftçi kurumun başı, Tvardiţa: «Başak bu yıl dolu pek gözäl, nica da geçän yıllar. Moldova hem Odessa selekţiyasından toumnar. Onnar dayanıklı bizim sıcaklara, hatalı durumnara. Büünkü günä onnar göstererlär kendilerini ii».
Üüsek temperaturalar getirdilär ona, ani çoyu kulturalar birdän oldular, da sıra geler hepsini toplamaa birerdä urguladı agrar bakanı Sergey İbrişim: «Büünkü günä baş problema, ani hepsi kulturalar hızlı oldular, zerä biz göreriz, ani koyuldu pek sıcak havalar, 36-38 gradus sıcak, kimi günerdäţ Birdän oldu goroh, raps, arpa, da hepsi tehnika çıkarıldı kırlara ki hızlı bereketi toplamaa. Bän isterim sölemää, ani bizim agrariyalar durumu kontrol altında tutȇrlar, saol onnara. Toplamak kompaniyası ilerler».
Ekini hem rapsı toplȇrlar kombaynalar, ama papşoyun hem semiçkanın bereketi şüpelendirer agrariyaları, çünkü sıcak havalar getridilär ona, ani nemnik toprakta azaldı. Bu kulturalar başladılar kurumaa.
Pavel Paskalov çiftçi kurumun başı, Tvardiţa: «Büünkü günä papşoy hem semiçka zeetlener, aarȇr nemnii , amma o yok. Bakarsak erä göreciiz büük çatlakları. Bakmadaan ona, ani hederlez hem kirez ayları nemniydi, çok yaamur vardı, biz bölä yaamurları bitki 25 yıl görmedik, amma geldi sıcak hava 45 gradusadan, bu pek belli etti kendisini büümnerdä».
Semön Novak çiftçi kurumun başı, Komrat: «Ne baalı bizim regionnan, bu vakıdadan zeetlendi büümnerin ikinci gruppası, amma bitki yaamur 22 milimetra yaamur verdi topraa, buraz durumu düzeltti. Bän düşünerim, ani ikinci gruppa, bitki dört yılın içindä bu yıl taa ii kendisini duyȇrlar».
Üülen tarafının agrariyalarına deyni bu yılkı sezon- diil sade bereketin büütmesi, ama vakıdında hem kayıpsız koymaa bereketi ambarlara. Nekadar bütündän toplanacek bereket belli olacek ondan sora nicä başaraceklar agrar sezonunu.