Her yıl dünnedä nışannanȇr böbreklerin dünnä günü- data getirer aklımıza saalıın hem böbreklerin önemnii için. Böbreklerin baş funkţiyası — paklamaa kanı, çıkarmaa toksinneri hem tutturmaa suyun ballansını güüdedä. Moldova devletindä geçän yıl 1200 kişi geçtilär gemodializ, her yıl 100 bindän zeedä proţedura yapılȇr, angıları yardım ederlär insannara tutturmaa kendi saalıını.
Komradın gemodializ merkezindä insannar, kimin böbrekleri işlämeerlär bütündän, geçerlär gemodializ proţedurasını, apparat paklȇȇr kanı. Nicä nışannadı doktor Vladimir Barbaroş, böbrek hastalıkları taa çok geçerlär simptomsuz. Ama var bir- iki simptom, angıları lääzım şüpelendirsinnär insannarı, da ozaman onnar doktorlara lääzım danışsınnar.
«Lääzım esaba almaa insannara, açan var problemalar bellän, pek yufka kendinizi duyȇrsınız. Bunnar baş sebeplär, ki danışmaa aylä doktoruna yada başka uzmannara. Bu günün neeti, haberlemää insannarı, ki taa çok esaba alsınnar profilaktikayı hem insan olsun taa üürenikli kendi saalıı için, maasuz böbreklär hastalıkları için»,- doktor Vladimir Barbaroş nışannadı.
İlerki diagnostika verer kolaylık vakıdında çeketmää ilaçlamayı da durgutmaa hastalıın ilerlemesini, nışannȇȇrlar doktorlar. Nicä urguladı Vladimir Barbaroş, ilaçlanmak gemodializ merkezindä yardım eder paţienta ii yaşamaa hem tutturmaa kendi saalıını.
«Bizdä gemodializ merkezinä geler 25 kişi, onnar bütün üülen tarafından, Komrat, Çadır dolaylarından, başka erlerdän. Hastalar gelerlär proţeduralara iki- üç keret aftada. Var transport, angısı onnarı getirer, bu uurda problema yok. Bizdä paţientlär risk grupasından — bu şeker hastalıı hem gipertoniya»,- Vladimir Barbaroş urguladı.
Gemodializ proţeduraları bir- iki saat sürterlär hem geçirilerlär bir -iki kerä aftada.
«2025 yılda bizim bölümdä yapıldı 3 bin 82 proţedura, gemodializ. Onnardan edi kişi hastalar bolniţadan . Kalanı bizim paţientlar. Hastalara hepsi lääzımnı ilaçları vereriz, bizdä 100 proţenda hepsi materiallar var. Maasuz paalı ilaçlar»,- adik yardımcısı Natalya dedi.
Medik yardımcıları kontrol ederlär paţentların halını, aparatların işini hem gözlederlär onnarın saalıını.
«Büün Böbrek dünnä günü da biz savaşȇrız nekadar taa çok ilinnetmää onnarın yaşamasını. Bizä gelerlär paţientlar, da biz savaşȇrız burada tutturmaa ii atmosferayı, ki onnara taa ilin olsun geçirmää bu proţedurayı. Kollektiv pek ii. Bän isteerim sölemää, ani insannar danışsınnar uzmannara, makar bir keret yılda profilaktika için. Taa ii ki etişmemää bu hala»,- Stefanida açıkladı.
Çoyu paţientlara deyni v dializ olȇr yaşamanın bir payı. Geçip hepsi bu proţeduraları, insannar ilerlederlär çalışmaa, yapmaa ev işlerini hem umudunu kaybetmeerlär.
«Savaşınız taa az işlemää. Bän 30 yılın içindä hiç bir keret tä hastalanmadım, bilmäzdim, neredä hızlı medik yardımı bulunȇr, kırıklarım yoktu. Gittim kazanca, işledim 4 yıl, da kaldım iki böbreksiz. Olunuz atent, açan işleersiniz. Vakıdında danışınız doktorlara, makar bir keret yılda».
«Saa ol işçilerä, pek yalpak onnar, dokrtor da profesional, düşünerlär bizi. Ne isteerim sölemää, ani insan korusun en önemni — kendi saalıını, zerä bişey diiştirmeycän, bir da paraya satın almayacan onu».
«İnsan lääzım baksın kendi saalıını, böbreklerini , kontrol etmää saalıını, zerä açan bu hala gelersin, zor. Bizim doktorların yardımınnan, büünkü gün biz yaşȇȇrız, götüreriz yaşamamızı. Maasuz bölä uzmannara».
Doktorlar getirerlär aklılarına, ani böbreklerin saalıı çekeder kolay kuralların bakılmasından , dooru imää, kontrol etmää tansionu, içmää nekadar lääzım su hem vakıdında geçmää doktorları. Böbrek dünnä günü- bu taa bir sebep düşünmää kendi saalıı için hem getirmää aklınıza, ani vakıdında diagnostika var nicä kurtarsın yaşamayı.