Komratta geçti konferenţiya,adalı Eni Baalantının çevirmesinin 20-nci yıldönümünä.Olayın pay alannarı lafettilär işin ilerlemesi için Eski Baalantının üstünä hem ruh literaturasının önemlisi için gagauz dilin korumasında. Konferenţiyadan sora musaafirlär dolaştırlar Komrat muzeyi. Onnar tanıştılar istoriyaylan, kulturaylan hem gagauz halkın ruh varlıınnan.
Forum adalı Eni Baalantının çevirmesinin 20-nci yıldönümünä birleştirdi Şveţiyadan Bibliya çevirmesindä institutun temsilcilerini,aaraştırıcıları, din izmetçilerini hem gagauz bilimcilerini. Baş tema oldu gagauz dilin koruması ruh literaturası aşırı hem aydınnadıcının Mihail Çakirin çalışmasının ilerlemesi.
PÖTR PAŞALI istoriya bilgileri doktoru
“ Var bir sıra kiyat şansora,angıları çevirili gagauz dilinä, çekederäk Mihail Çakirdän,angısı yaşamasını buna adadı.Büün bu iş ilerler,ne çekettirdi Mihail Çakir”.
Proektin pay alannarın önündä şindi başka bir davaa durȇr – ilerletmää çevirmeyi Eski Baalantının üstünä da. Bu adımın önemlisi için nışannȇȇr din izmetçilerin arasından temsilcilär da.
VLADİMİR KUSURSUZ pastor
“Bu buluşmak koyȇr temel ona,ki Eski Baalantı da çevirilsin gagauz dilinä, bütün Bibliya deyni olsun gagauz dilindä, hem bizim gagauz halkımız, okuyarak onu, olsun nicä şükür etsin Allahı bu çevirmek için”.
Pay alannar urguladılar,ani Bibliya tekstlerin çevirmesi – bu çok yıllık hem zor bilim-lingvistika işi, angısında lääzım mutlak pay alsınnar din izmetçileri, istoriklar, filologlar. En zor davaaların biri –terminologiyaylan işlemäk. Pötr Paşalının laflarına görä, çevirmeya katılı türlü konfesssiyalardan temsilcilär.
PÖTR PAŞALI istoriya bilgileri doktoru
“Bu iş faydalı da onu lääzım ilerletmää.Var umut,ani Eski Balaantı da çevirilmiş olacek. Eni Balaantı var gagauzça, Eski Baalantı da lääzım çevirilsin. Da ozaman bizdä olacek Bibliya gagauz dilindä. Ama çevirmää onu gagauz dilinä – pek zor iş”.
Bibliya çevirmesindä institutunda urgulȇȇrlar,ani hak okumaa Ayoz Yazıyı ana dilindä var herbir halkta, bakmayara nesoy o sayıda. “Ana dili- bu canın dili. Onuştan da gagauz dili çok önemli,da onu lääzım kullanmaa”, -urguladı İnstitutun başı Mattias Hollkvist.
MATTİAS HOLLKVİST Bibliya çevirmesi institutu başı, Şveţiya
“Herbir dil meraklı bizim için, küçük mü,büük mü halkta–ama herbirindä var. Herbir halkta var hak okumaa Bibliyayı kendi ana dilindä. Dil çok önemli, o önemli bizim özelliimiz için. Bana deyni pek önemli şved dili,çünkü bän şved”.
Konferenţiyanın pay alannarı urgulȇȇrlar,ani ruh litaraturanın çevirmesi gagauz dilin korumasında hem illerlemesindä büük rolü oynȇr. Bu verecek kolaylılk birleştirmää Bibliyanın iki payını bireri gagauz dilindä tiparlanan bütün kiyatta.