Büün Moldova Respublikasında nışannanêr o insannarın günü, Kim verer kolaylık bilgilerä hem informaţiyalara — laf gider Bibliotakacıların profesional günü için. Bununnan baalı, Komratta tombarlak masa geçti, neredä pay aldılar Komrat dolayın biblioteka uzmannarı.
Bibliotekacılar profesional günü birleştirer diil sade o insannarı, kim kiyatlarlan işleer, ama onnarı kim kurêr kultura uurunu hem terbi eder sevgiyi okumaya. Uşak bibliotekanın başı Vasilisa Pometkova çalışêr bu uurda artık 30 yıl. Onun laflarına görä, bu vakıt pek hızlı geçti.
«Insan, açan işleer, açan o hep lafeder, hep ne sa eni açêr, vakıt ozaman taa da pek hızlı geçer. Halizdän, büük saa ol isteerim kolektivä sölemää, onun büük faydası oldu, ani bän kaldım. Saerim, ani buncak yıl çalıştıynan, pek çok kuvet kuvet koydum bibliotekaya, çok iş hem türlü proektleri biz kollektivlän yaptık»,- Vasilisa Pometkova nışannadı.
Biblioteka uurunda kendi işini Vera Buyuklı başladı taa 1982-ci yılda.
«Bu iş benim, bän soluyêrım bu zanaatlan. Büük havezlän hem sevgiylän işä giderim. Sabaalen büük meraklıklan giderim iş erimä, çalışêrım 8 saat, da avşamneen şen evimä dönerim»,- Vera Buyuklı dedi.
Kultura bakannın habelerinä görä, büün Gagauziyanın bibliotekaları önemni kultura hem üüretim merkezleri kalêrlar. Onnar diil sade kiyatlarlan tanışmaa kolaylık vererlär, ama geçirerlär olayları, buluşmaları hem üüretim proektlerini. Nicä söledi Kultura bakannıın başın yardımcısı Aleksey Kara-Terzi, büün Gagauziyada 32 biblioteka çalışêêr, angılarına geler 21 bindän zeedä okuyucu.. büünkü gündä biblioteka — o diil sade kiyatlar. Draganovun adına bibliotekanın başı Mariya Nedälkova söledi, ani bibliotekalar şindi zamandaş er neredä bilgilär kabledilerlär hem ilerlemäk olêr.
«Bu yortu o insannarın, kim kiyadı hem kişiyi tanıştırêr, kim gelecää hem geçmişleri gösterer,kim lafı hem fikiri kaarşıladêr. Şindiki vakıtta biblioteka zanaatı enilendi. O diil sade kiyatların koruyucusu, ama profesional kendi işindä».
«Büün bibliotekacı- o êntuziast, her taraftan ilerlenmiş kişi, o biler hepsini, hızlı diişiler kinfayda getirmää okuyucuya. Belli ki proektlerdä çalışmaa diil pek kolay, ama biz korkmêrız da alınêêrız o zorluklarlan çalışmaa».
Bu profesional yortuylan baalı, Komratta tombarlak masa geçti. Burda bibliotekacılar lafettilär türlü eniliklär için kendi uurunda. Hep bu olayda verildilär diplomnar Moldovanın bibliotekacılar birliindän.