Basketbol birleştirer devletleri, kulturaları hem evlatboylarını. Dört yıldır arka arkaya Amerika Birleşik Devletin Missuri ştatından trenerlär Moldovaya gelerlär, ki genç sportçularınnan kendi becermeklerinnän paylaşmaa. Bu yıl master-klaslar «AİDARİS» cümnä kurumun desteeyinä görä geçirilêr. Çadır-Lunga hem Beşgözdan sora amerikalı trenerlär Komratta da sınışı yaptılar.
Sport zalında türlü yaşta basketbol sekţiyalarının terbiedenneri toplandı. Amerikalı trenerlärlän birliktä onnar top kullanmasını, meydanda işbirliini hem takım oyununu üürendilär. Amerika treneri John Tollinin sözlerinä görä, bu görüşmelerin baş neeti yalnız oyunu ii üürenmäk diil, ama diişmää becermeklärlän hem kendilerini ilerletmää.
JOHN TOLLİ basketbol treneri, Amerika
«Basketbol çok gözäl bir takım oyunuydur. O insana inatçılık, disţiplin hem insannarlan ii ilişkilär kurmaa üüredêr. Biz pek severiz bu oyunu bu pek meraklı. En önemlisi – oynamaa hem çok çalışmaa. Bir saat oyun için üç-dört saat sınış yapmak gerek.»
Genç sportçular için bu türlü master-klaslar Amerika sınış sistemasınnan tanışmaa hem eni çalışmalar üürenmää pek önemni. Uşaklar söleer ki, bu görüşmelär onnarı taa çok çalışmaa hem kendilerini geliştirmää motivaţiya verer. Çoyuna deyni basketbol oldu yaşamanın bir payı.
“Siz hiç bilmersiniz ne bizä deyni bu şınışlar. Bizä her kerä meraklı, neçinki bu insannar bilerlär basketbol kulturasını, amerikan kulturasını. Bu her kerä meraklı, faydalı, meraklandırȇr insannarı hem verer motivaţıya. Biz alȇrız onnardan eni becermekleri, ȇnergiya, da işleeriz ileri dooru.”
“Nesoy sınışlar lääzım, ki üürenmää Amerika basketbolunu? Çünkü Amerikada basketbol sayılȇr en kaavi sport çeşiti. Onnarda kaavi toplumnar var, oyuncular, okullar, kaavi programmalar. Nesa kendimä eni aldım, diil bir yıl oynȇȇrım, ama pek önemni görmää, nicä buna insannar Amerikadan bakȇrlar.”
“Eni becermeklär. Master- klaslar lääzım onun için, ki kaavileştirmää tehnikayı, o vakıt açan sän dinnersin, da unudulmasın, da bölä momentlerdän getirsin hepsini aklına.”
“Bän pek beendim, neçinki bu trenerlär pek kaavi geçirerlär sınışları”.
“Bän severim basketbolu. Bän taa ileri gidärdim futbola, ama vardı problema arkamnan, da sora başladım basketbola gezmää”.
Hazırlayıcıların sözlerinä görä, bu proje artık gözäl bir adet oldu. Dört yıldır amerikalı uzmannar kendi izinnerinä görä Gagauziyaya gelerlär da burada oynayan uşaklarlan sınışları geçirerlär, nışannadı “Aidaris” cümnä kurumun başı İvan İvançev.
İVAN İVANÇEV «AİDARİS» cümnä fondu başı
«Onnar kendi dinnenmäk günnerindä Moldovaya, özellikle Gagauziyaya gelerlär, ki bizim uşaklarlan kendi becermeklerinnän paylaşmaa. Hepsinin 25 yıldan zeedä trenerlik becermekleri var hem bildiklerini genç olannara vermää büük istemeklän gelerlär.»
Komrat trenerleri da söleerlär, bu türlü görüşmelär yalnız uşaklar için diil, trenerlär için da çok faydalıdır. Bu eni çalışmalar görmää eni hazırlanmak metodlarını, paylaşmaa becermeklärlän hem bulmaa eni ideyaları sınış proţesını geçirmää deyni. Nicä nışannadı uşak sport okulun treneri Sergey Garçu bölä olaylar vererlär uşaklara kolaylık üürenmää eni priyomları, taa sıkı işlemää komandada.
SERGEY GARÇU Komrat Uşak hem gençlik sport okulu treneri
«Bu her kerä ii açan başka devletlerdän bizä gelerlär, kimdä var çok becermek işlemää uşaklarlan, büüklärlän da. Da diişmää becermeklärlän türlü sferada- bu her kerä ii. Olaceydı taa ii ki bölä buluşmalar taa sık olsun, zerä bizim devlettä bu diil sık olȇr, maasuz üülen tarafında. Büün sportçuları tutmaa sportta taa zor nekadar çekmää onnarı, zerä konkurenţiya büük, gadjetlar çok vakıt alȇrlar. Herbiri isteer zanaatlanmaa kendiycesinä.»
Birkaç günün içindä amerikalı uzmannar Çadır-Lunga, Beşgöz hem Komratta master-klaslar geçirdilär. Hazırlayıcılar umutlanêrlar, kibu görüşmelär gelecektä da sık olacek. Çünkü sport gençleri birleştirer, onnarı ihlamlandırêr hem eni başarlar için yol açêr.